12.000 pertsonak baino gehiagok bisitatu dute Juan Carlos Eguillorren erakusketa

12.000 bisitari baino gehiago jaso ditu dagoeneko Rekalde aretoan ikusgai dagoen Juan Carlos Eguillor artista bilbotarraren Laberinto erakusketak. Obra bi aste gehiago egongo da irekita, irailaren 28ra arte.

Garikoitz Fraga Angoitia komisarioaren eskutik, Laberinto erakusketak mila pieza inguru biltzen ditu: jatorrizko lanak, argitalpenak, bideoak, dokumentuak eta objektu pertsonalak. Erakusketak Miss Martiartu edo Mari Aguirre bezalako pertsonaia ikonikoen sortzailea ezagutarazteaz gainera, ikus-entzunezko kultu-lanen egilea -Menina edo Bilbao, la muerte- eta bere garaiko ilustratzaile emankorra, eszenografoa, gidoilaria eta kronista grafikoa ere agerrarazten ditu.

Inauguratu zenetik, erakusketak adin eta jatorri guztietako bisitariak izan ditu, etenik gabe, eta haietako askok bisita errepikatu dute erakusketan dagoen materialaren garrantzia eta aberastasuna direla eta. Erakusketaren alderdi erakargarrienetako bat muntaketa da, zeinak Max Bilbao artistaren alter egoaren kutxa birtuala birsortzen baitu; bisitariei aukera ematen die literalki haren irudizko unibertsoetan barneratzeko.

Garikoitz Fraga Angoitia komisarioak gidatuko dituen azken bi topaketak irailaren 10ean eta 24an izango dira, 18:00etan; aukera paregabea da nahitaezkoa den erakusketa honen sekretuak eta gakoak zuzenean ezagutzeko.

Rekalde aretoan egindako Juan Carlos Eguillorren erakusketa, haren lana ezagutzen zutela uste zutenentzat berraurkikuntza izateaz gainera, ironia, kritika eta sorkuntza ikaragarria ezaugarri dituen legatuaren ospakizuna da. Labirinto artistiko hori datozen bi asteetan ere bisitatu ahal izango da.

Laberinto

Laberinto erakusketa Juan Carlos Eguillor Bilboko artista polifazetikoaren (1947-2011) lana ikusteko aukera ematen duen ibilbide sakon bat da. Haren obran aditua den Garikoitz Fraga Angoitia komisario duen erakusketak urteetako ikerketaren ondoren berreskuratu eta bildutako ia mila piezaz osatutako sorta aparta jartzen du ikusgai.

Horrez gainera, Laberinto erakusketan Juan Carlos Eguillorren lanaren alderdirik ezezagunena eta pribatuena erakusten da, haren obsesio pertsonalak eta munduari buruz zuen ikuspegia islatzen dituzten piezekin.

Laberintok Eguillorren lanari buruzko erakusketa osoenetako bat eskaintzen du, eta bereziki nabarmentzekoa da galdutako piezak berreskuratu direla eta artistak bere ibilbidean utzitako marrazki eta koaderno ugariak arakatu direla.