Durangoko 2026ko Aurrekontu Parte-hartzaileen prozesuak aurrera darrai, oraingoan udalerriko auzoak ardatz duena. Herritarren artean aurkeztutako proposamenak aztertzeko eta lehentasunak finkatzeko fasean murgilduta dago prozesua. Guztira, 95 pertsonak eta elkarte batek hartu dute parte, 101 proposamen aurkeztuz (iaz 39 izan ziren), eta horietan herritarren kezkak eta auzoetako beharrak islatu dira.

Guztira, 600.000 euro bideratuko dira hautatutako proposamenetara, auzo bakoitzeko 100.000 euro. Parte-hartze handiena izan duten auzoak honako hauek izan dira: Erdialdea (27 proposamen), San Roke (22 proposamen) eta Landako (17 proposamen). Parte hartzeko bide nagusia webgunea izan da (72 proposamen), baina baita paperezko inprimakiak erabiliz (24) eta SACen aurrez aurreko arreta bidez (5) ere jaso dira proposamenak.

Maiatzaren 2tik 31ra bitartean, udaleko sail desberdinek izango dute proposamenak aztertzeko ardura. Proposamenek prozesuan ezarritako irizpideak betetzen dituzten aztertuko da: bideragarritasuna eta kostu ekonomikoaren estimazioa, besteak beste. Irizpide hauek betetzen dituztenak lehentasunen arabera sailkatuko dira.

Gainera, udal estrategiaren eta interes orokorraren irizpideak ere kontuan hartuko dira. Helburua da proposamen kopuru egoki bat hautatzea bozketa fasera pasatzeko. Proposamen antzekoak badaude, proiektu bakarrean batuko dira ebaluazioa errazteko.

Auzoetako proposamenak:

  • San Roke: Otamotzenako parkean komuna jartzea, "Aterpe" estalia sortzea, haur parkeen hobekuntza, futbito eta saskibaloi kantxa estalia sortzea eta autokarabanentzako gunea instalatzea proposatu dira.
  • San Fausto: Errotaritxuenako parkean ur-gunea jartzea, haur jolas-parkeen hobetzea, Bilbora doazen lineentzako autobus geltokia sortzea, jolas-parkeetan zuhaitzak landatzea eta parke batzuetan estalkiak jartzea proposatu dira.
  • Landako: Matxinestarta kaleko argiztapena hobetzea, tenis pista estalia sortzea, tenis pistetako zoladuraren hobekuntza (ur-pilaketak saihesteko), Untzillaitz kaleko oinezkoentzako pasabideak eta Gallanda kaleko parke irisgarri bat proposatu dira.
  • Madalena: Bidegorriaren luzapena Muruetatorrera, Francisco Ibarra ingurua berrurbanizatzea (gune berde gehiago eta aulkiak), Ermodo kalea oinezkoentzat bihurtzea, estalitako haur parkeen sorrera eta jolas-eremuak egokitzea eskatu da.
  • Erdialdea: Matute parkea berriztatu eta hobetzea, Astarloa kalea oinezkoentzat bihurtzea (arkitektoniko oztopoak kentzeko), San Agustinalde eta Mañaria ibaiko garbitegiak bezalako ondare espazioak berreskuratzea eta Montevideo eta Juan Mari Altuna kaleetako bide-segurtasuna hobetzea proposatu dira.
  • Tabira: Intxaurrondo erdian kirol anitzeko kantxa bat sortzea, Tabirabide kalea hobetzea oinezkoen igarobidea errazteko, 7ko futbol zelaiko belarra berritzea, Zuhatzola parkeko autokarabanen gunea sortzea eta Tabirako igerilekuetan igeriketa-instalazioak handitzea eskatu da.

Azterketa fase hau amaitutakoan, hautatutako proposamenak bozketa fasera igaroko dira, ekainaren hilabetean. Hautatu ez diren proposamenak ere argitaratuko dira, bazterketaren arrazoiak azalduz.