29 urtez Arbaso elkarteko presidente izan den Bernat Vidali omenaldia egin diote

29 urte luzez Arbaso elkarteko presidente izandako Bernat Vidalek kargua utzi berri du, eta Durangoko Udalak omenaldi berezi eta sentikor bat egin dio astelehen honetan, abenduaren 23an, udalerrian garrantzia handiko pertsona izan baita azken urteetan. Aurten Durangoko Azokaren barruan hogeita zortzigarren edizioa ospatu duen Euskal Denda artisautza azokako sustatzaile bezala oso ezaguna da Vidal, besteak beste.

Mireia Elkoroiribe Durangoko alkateak, Udalbatzako zinegotziekin batera, Vidalen ibilbidea eta udalerriari egindako ekarpen baliotsua nabarmendu ditu Udal Osoko Bilkura aretoan egindako ekitaldian. Omenaldian, Elkoroiribek euskal artisautzaren sustapenarekin duen konpromisoa eta Euskal Dendaren arrakastan duen funtsezko papera azpimarratu ditu, Durangon erreferente kultural eta ekonomiko gisa sendotu den ekitaldia.

Esker on gisa, Udalak plaka oroigarri bat eman dio Vidali, nekaezin egindako lana eta Durangoko hiribilduari egin dion ekarpena eskertzeko.

Euskal Denda, artisautza eta kultura ondarea

Bernat Vidalen zuzendaritzapean, Euskal Denda bertako eta Euskal Herri osoko artisauen lanaren erakusleiho bihurtu da, eta urtero milaka bisitari erakartzen ditu. Ekitaldi honek, tokiko ekonomia dinamizatzeko ez ezik, euskal artisauen tradizioak eta egiten jakitea zaintzeko eta ikusarazteko ere balio izan du.

Durangoko Udalak biziki eskertu nahi izan du Bernat Vidalek 29 urte luzez izan duen dedikazioa eta berretsi egiten du hiribilduaren bizitza aberastuko duten ekimen kultural eta ekonomikoak babesten jarraitzeko konpromisoa.