Ostiral honetatik igandera bitartean, hau da, urriaren 18tik 20ra, Sestaok Dendak Kalera azoka arrakastatsuaren edizio berri bat ospatuko du. Merkatarien Elkarteak tokiko merkataritza sustatu nahian sortutako ekimen hau Kasko plazan egingo da, bertan jarriko den karpa batean, eta establezimenduek beren artikulu eta zerbitzuak eskaini ahal izango dituzte.
Ekimen horretarako Merkatarien Elkarteak antolatu duen programak udalerria dinamizatu nahi du euren zerbitzu eta saltokiak sustatuz eta, aldi berean, bezeroei familian bizi ahal izateko moduko jardunak eskainiz.
Aurtengo Dendak Kalera azoka "Sortu, zaindu eta partekatu zure tokiko mundua!" lelopean garatuko da, sormenaren, jasangarritasunaren eta tokiko komunitatearen balioak azpimarratu nahi baititu.
Karpa 17:00etatik 20:30era egongo da irekita ostiralean, urriaren 18an; 11:00etatik 14:00etara eta 17:00etatik 20:30era urriaren 19an, larunbatean; eta 11:00etatik 14:30era urriaren 20an, igandean. Parte hartuko duten hamar saltokiak, besteak beste, honako sektore hauetakoak dira: ehungintza, estetika, liburu-denda eta paper-denda, produktu ekologikoak eta etxeko tapizeria.
Parte hartzen duten negozio guztiek azokaren erdiko gunea aprobetxatu ahal izango dute beren negozioa sustatzeko, eta larunbatean, 18:00etatik 20:00etara, guztien aurkezpen berezia egingo da. Gainera, pantaila bat jarriko da saltokiek asteburu osoan publizitatea egin ahal izateko.
Etxeko txikienek haurrentzako jardueretan dibertitzeko aukera izango dute, gurasoek erosketak egiten dituzten bitartean. Ildo horretan, larunbat goizean poltsak pertsonalizatzeko tailer bat egingo da, larunbat arratsaldean collagetailer bat eta igande goizean birziklatze-tailer bat.
Auzokideak azokan erosketak asteburuan egitera animatzeko, antolatzaileek deskontu-txartelak emango dituzte azokan egindako erosketengatik eta azokan kontsumitzeko haur-jardueretan parte hartzeagatik. Gainera, 100 euroko bi txartel zozketatuko dira standetan egindako erosketengatik, kanpainari atxikitako establezimenduetan kontsumitzeko.
