Lekeitio Lagunkoiak kide berriak behar ditu

Lekeitio Lagunkoia taldeak kide berriak behar ditu Lekeitio udalerri adiskidetsuagoa eta irisgarriagoa bihurtzeko helburua lortzeko. Horregatik, herritarrei dei egiten die ekimen honetan parte har dezaten.

2017tik, Lekeitio Lagunkoia taldeak ibilbide luzea egin du udalerri lagunkoi eta irisgarriagoa eraikitzeko. Talde eragilearen lankidetzari esker, udalerria nabarmen hobetu duten hainbat ekimen inplementatu dira. Orain une erabakigarrian daude aurrera egiten jarraitzeko, eta ahots eta esku berriak behar dituzte ibilbide hori indartzen jarraitzeko.

Beraz, parte hartu nahi duten herritarrak erakartzeko asmoz, Lekeitio Lagunkoia taldeak triptiko berri bat eta aurkezpen bideo bat kaleratu ditu. Horietan taldea sortu zenetik egindako ibilbidea azpimarratzen da, hala nola Argaizto parkea berritzea, edota ingurumenari eta ongizateari buruzko sentsibilizazio-kanpainak. Horretaz gain, nabarmentzekoa da 2023an Lagunkoitasuneko Jardunbide Egokien Saria jaso zutela, beren lanaren eragin positiboa islatzen duen aintzatespen gisa.

Lekeitio Lagunkoia taldearen bilerak hilero egiten dira, ordubeteko iraupena dute eta parte hartu nahi duten guztientzat irekita daude. Hurrengo bilera urriaren 15ean izango da 10:00etatik 11:00etara.

2024. urtearen amaierarako, Lekeitio Lagunkoia taldearen helburu nagusia herritarren parte-hartzea sustatzea izango da, bereziki persona nagusien bizi-kalitatea hobetzeko ekimenetan. Taldeak herritar guztiak gonbidatu ditu ekimen honetan parte hartzera, eta ziur daude jendearen inplikazioa funtsezkoa izango dela Lekeitio adiskidetsuagoa lortzeko.

Gogoratu behar da Lekeitio Lagunkoia taldea apirilean elkartu zela Santa Elena ermitan berrikuntza lanak burutzeko. Lekitto Bedarra eta Denbora Bankuko kideen laguntzarekin, auzolan ekintza egin zuten Santa Elena ermitan.