Datorren asteazkenean, uztailaren 3an, hasi eta bost egun iraungo duten Sallabente auzoko jaietako egitaraua aurkeztu du aste honetan Ermuko Udalak. Erdi Aroko azoka, gastronomia-jarduerak eta musika-ikuskizunak izango dira protagonista nagusiak egun horietan.
Jaiei hasiera emateko, auzoko zazpi establezimenduk pintxo lehiaketan parte hartuko dute asteazken eta ostegunean. 19:00etatik aurrera, prestatutako mokadu goxoak dastatu ahal izango dira Salmantino, Villa de Ermua Hotela, Niza, Itxaso, Iparralde, Zugaitz eta Pedres tabernetan. Ostegunean, gainera, haurrentzako jolasak izango dira 18:00etatik aurrera Inguru Abenturaren eskutik, eta askaria antolatuko da parte hartzen duten guztientzat.
Jarduera gehienak uztailaren 5ean, ostirala, hasiko dira, Erdi Aroko azoka handiaren irekierarekin: artisauak eta merkatariak, haurrentzako jarduerak, atrakzio ekologikoak, ikuskizun ibiltariak eta askoz sorpresa gehiago izango dira. Azoka ostiralean 18:00etatik 23:00etara, larunbatean 11:00etatik 23:00etara eta igandean 11:00etatik 22:00etara egongo da zabalik.
Musikak ere leku garrantzitsua izango du jaietan: ostiralean Makro Disko Festa 20:30etik 21:30era eta 23:00etatik 03:00etara, La Principal orkestraren berbena larunbatean 23:00etatik 03:00etara, eta Los Blues Yeyes taldearen kontzertua igandean, 20:00etatik 21:30era.
Gastronomiari dagokionez, pintxo lehiaketaz gain, larunbatean eta igandean herri bazkaria izango da 14:00etan eta sardina-eta saiheski-jana 19:00etan. Igandean, gainera, hirugarren adinekoentzako lunch bat eskainiko da parriladaren ostean.
