42.577.303 euroko aurrekontua izango du Durangoko Udalak aurten

Joan den ostegunean, ostailaren 15ean, Durangoko Udalbatzak 2024rako aurrekontua onartu egin du ospatutako presako osoko bilkura berezian. Bada, aurtengo aurrekontua 42.577.303 eurokoa izango da, eta onartu egin ahal izan da EAJ-PNV, PSE-EE eta PPko zinegotzien aldeko botoekin.

2024rako aurkeztutako aurrekontuak EAJ-PNVk eta PSE-EEk osatutako udal-gobernuko taldeak 2023-2027 legegintzaldian garatu nahi duen ekintza politikoaren isla dira, eta Gobernu Programan ezarritako helburuei eta ekintzei erantzuten diete. Gobernu-taldeak adierazi duenez, "zalantzazko egoera baten aurrean, eta kostuak etengabe handitzen ari direnez, pertsona guztientzat eta administrazio publikoarentzat, gobernu-taldeak ahalegin handia egitea erabaki du, herritarren eta tokiko merkataritzaren presio ekonomikoa ez handitzeko".

Horregatik, udal-gobernuak erabaki du tasak eta zergak izoztea eta hobari berriak ezartzea. "Horrek berekin dakar, halabeharrez, zuzeneko zergen bidezko diru-sarrerak izoztea, eta, ondorioz, aurrekontu zorrotza eta kontrolatua egitea, inbertsio gutxirekin, benetako premiei erantzuteko, pertsonak beti erdigunean jarrita".

Herritarren ongizatearen eta bizi-kalitatearen alde

Testuinguru horretan, Udalaren apustu nagusia Durangoen ongizatea eta bizi-kalitatea hobetzeko zerbitzuak, programak eta ekintzak indartzea da, baita enplegua eta jarduera ekonomikoa sortzea ahalbidetzen dutenak ere. Hori dela eta, gobernu-taldeak adinekoentzako programak bultzatuko ditu, Durango Kirolaken kirol-zerbitzuak eta jarduera fisikokoak indartuko ditu, Antso Estegizen argiteria publikoa eta irisgarritasuna hobetuko ditu, Durangon merkataritza eta turismo jarduera bultzatuko du eta Eguzkitzako industria-arloaren garapenean aurrera egingo du, besteak beste.

Gobernu-taldeak azaldu duenez, programa bakoitzerako behar diren partidak zehazteko, azken bost urteetako gauzatze erreala hartu da kontuan. "Horrela, gastu-partidak beharrizanetara eta horiek gauzatzeko benetako ahalmenera egokitzeko ariketa garrantzitsua egin da".

Gastuen aurrekontuak Udalaren helburu nagusiei erantzuten die, eta Herritartasun, Lurralde eta Antolaketa arloetan antolatzen da.

Herritarrak

Herritartasunaren arloak gizarte-ekintzako zerbitzuak, adinekoak, berdintasuna, gazteria, kirola, kultura, hezkuntza eta euskara biltzen ditu, eta Udalak legegintzaldi honetarako duen helburu nagusia Durangoko pertsona guztien ongizatea sustatzea da.

Arlo horretan jasotako proiekturik garrantzitsuenak honako hauek izango dira, besteak beste: adinekoen zentroa eraberritzea, Genero Indarkeriaren Unitatea abian jartzea, etorkinak hartzeko eta integratzeko beharrezkoak diren baliabideak bideratzea, udalerriko kirol zerbitzuak eta instalazioak indartzea eta hobetzea Durango Kirolak-en aurrekontua nabarmen handituta, Durangaldeko Behargintzarekiko lankidetza estutzea, eta tokiko enplegu-plan berri bat abian jartzea, udalerriko instalazioetan kultura-programak bultzatzea Durango erreferente kultural izan dadin Durangoko Azokatik harago, eta euskararen erabilera areagotzeko politikak abian jartzea, bai Udalean, bai udalerrian.

Lurraldea

Lurralde-arloak barne hartzen ditu hirigintza, etxebizitza, ingurumena, jasangarritasuna, mugikortasuna, merkataritza eta turismoa, eta arlo horretako proiekturik garrantzitsuenak hauek izango dira: Trenbidearen Barne Eraldaketarako Plan Bereziaren garapena, etxebizitza, zerbitzuak eta parke handi bat barne hartuko dituen adostasun-proiektu batekin; Aramotz auzoaren birgaitze integrala; bide publikoen mantentzea, Fauste kaleko oinezkoen gunea amaitzea; eta Urki-Hegoalde bideari jarraipena ematea.

Etxebizitzaren arloan, babes publikoko 16 udal-etxebizitzak jarriko dira eskuragarri, eta babes publikoko etxebizitza berriak sustatzeko lan egingo da. Gainera, mugikortasun jasangarriaren, zarataren eta energia-efizientziaren arloko hainbat jarduketa garatuko dira, Mugikortasun Plana berrikusiko da, eta zehatz-mehatz aztertuko da egungo aparkaleku-sistema, auzo batzuetan gaur egun dagoen presioa murriztea ahalbidetuko duten hobekuntzak ezartzeko.

Gainera, argiztapen-gastua handitu da, energia elektrikoaren hornidurarako eta argiztapena hobetzeko kontratu berri bat abian jartzeko, Merkataritzaren Plan Estrategikoan jasotako neurriak abian jarriko dira, eta Merkatu Plazaren birmoldaketari dagokionez, aurreproiektua merkatari, baserritar eta herritarren behar eta eskaeretara egokitzea aurreikusten da, bai eta gauzatze-proiektua idaztea ere, beharrezko finantzaketa ziurtatu bezain laster gauzatu ahal izateko.

Antolaketa

Antolaketaren arloak eremu hauek hartzen ditu: langileak, segurtasuna, kudeaketa ekonomikoa, aholkularitza juridikoa, komunikazioak, gardentasuna, parte-hartzea eta zerbitzu publikoen kalitatea.

Arlo honetan, nabarmentzekoa da langileek Durangoko Udalaren aurrekontuan duten garrantzia, langileen politiketara bideratutako partida 11.918.500,39 eurora igo baita, hau da, udal-aurrekontuaren % 28. "Eremu horretan, enplegu publikoa finkatzeko prozesuan murgilduta gaude, eta horri esker, guztira 45 plaza egonkortu ahal izango dira udalean, gehi 56 erakunde autonomoetan, hau da, 101 plaza guztira".

Halaber, plantilla indartu egin da, denbora luzez bete gabe zegoen ofizialordearen lanpostua betez; parte-hartzea sustatuko da, aurrekontu parte-hartzaileen sistema berri bat abian jarriz eta hainbat prozesu irekiz; auzo-elkarteekin komunikatzeko eta harremanak izateko bideak indartuko dira; eta informatika eta telekomunikazio ekipamenduak modernizatzeko eta berritzeko inbertsioekin jarraituko da, digitalizaziorantz aurrera egiten jarraitzeko.