Heldu da abendua eta horrekin batera, eskualdeko udalerriak prestatzen ari dira ate-joka dauden gabon-jaiak bizitzeko. Amorebieta-Etxanoren kasuan, txikiek eta helduek hainbat eta hainbat jardueraz gozatu ahal izango dute, eta hurrengo asteetan ez dira faltako zuzeneko musika-emanaldiak, antzezlanak, aurkezpenak, ikuskizunak, kirol-ekitaldiak, erakusketak... eta, nola ez, Olentzero eta Mari Domingiren eta Erregeen Kabalgatak ere. “Gabonak egun bereziak dira, Amorebieta-Etxanoko familia eta koadrila asko berriz elkartzen baitira egun horietan. Horregatik, Udalak, tokiko erakunde eta elkarte hauekin batera, Gabonak ospatzeko programa anitza eta zirraragarria diseinatu dugu”, azaldu zuen ostiral goizean emandako prentsaurrekoan Ainhoa Salterain alkateak.
Programazio berezi honen hasiera asteartean izango da, hilak 5, Herriko Plazan Gabonetako argi piztearekin batera. Ekitaldi honetan zuzeneko musika emanaldiak izango dira Triki Piu eta Zubiuar Musika Eskolako abesbatzaren eskutik. Gainera, tradizioaren parte gisa, txokolatada goxoa eskainiko zaie bertaratzen diren guztiei.
Zalantzarik gabe, abenduaren 24an eta urtarrilaren 5ean egingo diren kabalgatekin zerikusia izango dute Gabonetako egitarauko unerik esperotsuenetako bik. Batetik, Udaberri Dantza Taldeak antolatuta, Gabon gauean Olentzero eta Mari Domingiren etorrera une gogoangarria izango da haur zornotzarrentzat. Bestetik, Errege Egunaren bezperan, Meltxor, Gaspar eta Baltasar Errege Kabalgatan desfilatuko dute herriko kaleetan zehar.
Gabonetako Haur Parkea Aurtengo ekimenik nabarmenetako bat Gabonetan Jai da, Zelaietako Amorebieta IV pilotalekuan dagoen Gabonetako haur-parkea. Aurtengo ediziorako birdiseinatu egin da, haur guztien dibertimenduan eta gozamenean arreta berezia jarriz. Zentzu horretan, abenduaren 26tik 30era egongo da zabalik, eta sarrerak eskuragarri egongo dira gazteentzako informazio-bulegoan, egun bakarreko sarrera 4 euroren truke, 4 eguneko bonua 12 euroren truke eta 5 eguneko bonua 15 euroren truke. Gainera, txu-txu trenak Zornotzako kaleak zeharkatuko ditu 26tik 29ra, Gudari kaleko autobus geltokitik irteerekin, 11:00etatik 14:00etara eta 17:00etatik 20:00etara.
Horrez gain, gazteei zuzendutako Gauero Gabonetan programa ere izango da eta abenduaren 23an edizio berezi bat eskainiko du Zelaietako kontzertu-aretoan. Programazio guztia udalaren webgunean eskuragarri dago.
