Gazteei emantzipatzen laguntzeko zerbitzu berria abiaraziko du Sestaok

Gazteen emantzipatzioaren arazoari irtenbide bat bilatzeko aurrerapauso bat eman berri du Sestaoko Udalak, informazio- eta aholkularitza-zerbitzu berri bat abiaraziz. Ekimen honekin, emantzipazio-prozesuek dakartzaten zailtasunei aurre egiten lagunduko zaie, aste honetatik eta 2023 urte osoan zehar.

Programa hori astean hiru egunetan egongo da eskuragarri (astelehen, asteazken eta ostiraletan, 16:30etik 20:30era) Gazte Informazio Zentroaren bulegoetan (Iberia kalea z/g), eta kontsultak Whatsapp bidez ere bideratu ahal izango dira, 747 47 54 22 telefono-zenbakira deituta.

Hezitzaile baten laguntza izango duen baliabide horri esker, Gazteria Sailak honako zerbitzu-multzo hau eskainiko dio publikoari:

• Enplegua bilatzeko aholkularitza (curriculuma egitea eta hobetzea, lana bilatzeko prozesuak, lan-elkarrizketa).
• Ekintzailetzarako laguntza.
• Prestakuntzarako orientazioa.
• Egoitza-emantzipaziorako eskuragarri dauden informazioa eta baliabideak eskuratzen laguntzea.
• Mugikortasun- eta itzulera-prozesuetarako laguntza.
• Gizarteratzea eta bazterkeriari arreta ematea.
• Kontziliaziorako baliabideak.

Zerbitzu hau martxan jartzearekin, Sestaoko Udalak emantzipazioaren ardatz honetako arreta indartuko du, gazteentzat garrantzitsuenetakoa baita. Eduardo Abad Gazteria zinegotziak modu positiboan baloratu du bere sorkuntza: “Gazteen beharren detektagailu gisa jardungo du. Jasotzen ditugun kontsulten arabera, Udaletik zuzenean erantzun ahal izango diegu, edo beste administrazio batzuetara bidaliko ditugu, behar dituzten programak eskaintzeko.”