Ermuko historiako pasarteak jasotzen dituen komikia aurkeztu du Udalak

Obran Francisco Izagirre kultua, Alejandro Aranburu Droget abenturazalea edo Felix Izagirre pilotaria aurki ditzakegu.

Komiki honen helburua Ermuko historiaren alderdi batzuk ezagutaraztea da. Halaber, liburutegiak berak udalerriaren bilakaerari buruz Tokiko Bilduman bildu duen informazioa balioetsi nahi du. Bertan, hirigintzari edo denboran zehar gure herriak izan dituen ezaugarriei buruzko erreferentziak jasotzen dira.

Lana Mikel Begoñak, Kike Infamek eta Daniel Gojenolak egin dute. Mikel Begoña, gidoiaren egilea, historialari eta gidoilari ospetsua da, eta bere sorkuntza guztietan historiarekiko grina eta osagai sozial sendoa sartu ditu. Marrazkiaren sortzailea Kike Infame komikigile eta dibulgatzailea da, eta duela urte batzuetatik liburutegiko komiki-irakurketa-kluba dinamizatzen du. Egun haietako bizimodua bere marrazkietan islatzen saiatu da Infame, gaurkotasunera hurbiltzen den estilo garaikidea alde batera utzi gabe. Lana osatzeko, Daniel Gojenola koloreaz arduratu da.

Istorioari heltzerakoan, hiru artistak bertako pertsonaiengana hurbildu dira, Ermuko idiosinkrasia hobekien erakusten duten eguneroko eszenak birsortzen saiatuz. Horregatik, protagonisten aukeraketa garrantzitsua izan da, Francisco Izagirrek eta Drogetek bizitza pentsatzeko eta ikusteko bi modu ezberdin eta osagarri islatzen baitituzte.

Komikia formatu digitalean eskuragarri dago Ermuko Udalaren webguneko Tokiko Bilduma atalean.

Obra hau argitaratzearekin batera, Bigarren Hezkuntzako herriko ikastetxeentzat unitate didaktikoa prestatuko du liburutegiak. Horrela, irakasleek komikiaren edukiak lantzeko aukera izango dute euren ikasleekin. Helburua Ermuko historia modu entretenigarrian ezagutaraztea da, eta aldi berean, liburutegiaren Tokiko Bilduman eskuragarri dauden edukiei balioa ematea.

Binetak ideiak transmititzeko

Ermuko Udalak, liburutegiaren bitartez, komikiak eta binetek ideiak eta edukiak transmititzeko duten ahalmena aitortzen du, errealitate konplexuak modu errazean kontatzeko bitarteko egokia baita. Lengoaia hori aukeratu da gure herriko historiaren zatiak ezagutarazteko, eta erakundeak espero du kapitulu txiki hau askoren artean lehena izatea. Lan hau XX. mendearen lehen herenean gertatutakoez ari da, eta, beraz, zenbaki berriak edita litezke, istoriotxo honi jarraipena emango dioten beste une eta gertaera historiko batzuk barne hartzeko.

Udal liburutegia aspalditik ari da haur eta helduen artean komikien irakurketa sustatzeko jarduerak programatzen. Istorio grafiko honen edizioa komikien irakurketa sustatzeko kanpainaren beste urrats bat da.