Urtero bezala, Ermuko Udalak ezagutzera eman ditu zeintzuk diren herriko leihoak eta balkoiak apaintzeko lehiaketaren irabazleak. Irabazleek, Pilar Muradas eta Sagrario Gómez-Limón, 200 eta 150 euroko txeke bat jasoko dute sari moduan, udalerriko Merkataritza eta Ostalaritza Elkarteko saltokietan erabiltzeko.
Juan Carlos Abascal alkateak eta Jol Gisasola Ingurumen zinegotziak diplomak eta txekeak eman dizkiete irabazleei. Lehiaketa herriko Udalak antolatu du Debegesa eskualdeko Garapen Agentziarekin elkarlanean.
Hamabi (12) lagunek parte hartu dute aurtengo edizioan, lehiaketan izena eman ondoren. Epaimahaiak apaindutako balkoi eta leiho guztiak bisitatu eta baloratu ditu, saridunen zerrenda erabakitzeko, oinarrietan jasotakoaren arabera. Balorazio-irizpideak honako hauek izan dira: konposizioaren originaltasuna eta sormena, apainduren kalitatea, multzoaren harmonia eta diseinua, bai eta lan-gaitasuna ere.
Tokiko lehiaketako lehen saria, esan bezala, Pilar Muradas Crespok irabazi du. Irabazleak loreak eta landareak konbinatzen dituen balkoia du, batzuk kanpora zintzilik eta beste hainbat loreontzi lurrean. Ugari ditu, desberdinak, eta sasoikoen artean petuniak eta geranioak. Balkoiak udazken-neguan ere baloratzea proposatu du, udaberri-uda garaian bakarrik egin ordez.
Lehiaketako bigarren sailkatua Sagrario Gómez-Limón izan da. Balkoian eta leihoetan espezieak konbinatzen ditu baita ere, nahiz eta gehienak geranioak eta liliak izan, urte osoan arreta handiz zaintzen dituenak. Sagrariok edizio ezberdinetan parte hartu du eta aurreko edizioan ere saritua izan zen. Hori dela eta, hurrengoetan ezin izango da berriro izan, etorkizuneko edizioen oinarriek saria gehienez bi aldiz mugatuko baitute, beste parte-hartzaile batzuei aukerak zabaltzeko.
Lehiaketa honek udalerriko ingurumenaren eta estetikaren kalitatea hobetzen lagundu nahi du, herritarren inplikazioaren bidez. Landare- eta lore-elementuek hiri-ingurune atseginagoa eta estetikoagoa sortzen laguntzen dute, goza dezaten, eta ekimenaren bidez ohitura on hori herritarren artean zabaldu nahi izan da.
