4,1 milioi euroko inbertsioa

Kareagako eta Aparkabisako biribilguneen arteko lotuneak hobetuko dira

12.08.2020 | 21:59
Irailean hasiko diren lanen planoa.

BILBO. Datorren hilabetean hasiko diara A-8 eta BI-644 errepideen arteko lotuneak hobetzeko obrak. Bizkaiko Foru Aldundiak 4,1 milioi euro bideratuko ditu Aparkabisa eta Kareaga biribilguneen arteko errepide zatiak autobidea industrialdeekin, Bizkaia Aparkabisa garraio-zentroarekin eta Megapark eta Max Center merkataritza-guneekin lotzeko. Trafiko handia jasaten du bide horrek, batez beste 54.000 ibilgailu inguru egunean, eta horietatik 4.000 ibilgailu astunak dira.

Imanol Pradales Azpiegituretarako eta Lurralde Garapenerako foru diputatuak adierazi duenez, lanak irailean hasiko dira eta 16 hilabete eta erdi irautea aurreikusi da. Bere esanetan, inguru hori seguruagoa izatea, sarbideak hobetzea eta zirkulazioa arinagoa izatea lortu nahi da. Asmo horrekin, Foru Aldundiak 4.133.892 euroko inbertsioa egingo du hainbat jarduketa gauzatzeko Aparkabisako biribilgunean, BI-644 errepidearen adarrean, A-8tik sartzeko bi adarretan eta Kantabriarako noranzkoan autobidera sartzeko adarrean.

BI-644 errepidearen enborra, Kareaga eta Aparkabisa biribilguneen artean

BI-644 errepidearen zati horretan, 670 metro inguruko luzeran, hainbat jarduketa egingo dira; besteak beste, erdibitzailean hesi bat jarriko da, zirkulazioaren bi noranzkoak bereiziz. Horri esker, segurtasuna hobetuko da, aurrez aurre talka egiteko arriskua ezabatuko baita. Gainera, tarte horretan seinaleak hobetzeko, seinaleak izango dituzten bi arkupe handi eraikiko dira eta dagoen semaforoa birmoldatuko da ikuspen handiagoa emateko.

Era berean, galtzadaren gainean ere jardungo da: dauden peralteak hobetuko dira, ura behar bezala husten dela bermatzeko, eta autobidearen adarrekiko lotuneak horien gainean egingo diren esku-hartzeetara egokituko dira.

Aparkabisako biribilgunea

Biribilgune honek BI-644 errepidearen, Aparkabisa industrialdearen eta Megapark merkataritza-gunearen arteko trafikoa banatzen du, eta obra honetako jarduketa nagusietako bat izango da. Biribilgunea lau metro inguru mugituko da ipar-mendebalderantz, trazatua egokituz eta A-8 autobidetik edo Kareagako biribilgunetik datozen ibilgailuentzat Megaparkera zuzenean sartzeko adarra sortuz. Horrela, zirkulazio-mugimendu hori (A-8/Kareaga, Megapark alderantz) biribilgunetik igarotzea saihestuko da, eta zirkulazio nabarmen gutxiago izango du.

A-8 autobidea (Kantabriarako noranzkoan) BI-644 errepidearekin lotzeko adarra

Autobidetik, Bilbo-Kantabria noranzkoan, BI-644 errepidera sartzen diren ibilgailuei errazago egingo zaie mugimendua, lotura-kurban gainzabalerak ezarri direlako eta bi bideen arteko lotura-kurbako peraltea hobetu delako. Era berean, adar horren oinplanoa hobetuko da, trantsizioko klotoideak eta erradio handiagoko kurbak sartuta.

A-8 autobidea (Bilborako noranzkoan) BI-644 errepidearekin eta Kareagako biribilgunearekin lotzeko adarra

Aurreko adarrean bezala, Kantabria-Bilbo noranzkoan autobideko galtzada lotzen duenean, oinplanoko trazadura zuzendu egingo da, bihurgune egoki batekin eta dagozkion gainzabalera eta peralteekin. Gaur egungo drainatzea ere egokitu egingo da, Kareagako biribilgunearen inguruan galtzadaren gainean ura pilatu ez dadin.

Bestalde, adar horretan, zirkulazio-erreietako bat kenduko da, biribilgunearekiko lotura biribilgunearen errei-kopurura egokituz. Gaur egun, Kareagako biribilguneak bi errei ditu, baina hiru zirkulazio-erreitik sartzen dira ibilgailuak biribilgunera: bi autobidetik datoz eta bat BI-644 errepidetik. Jarduketaren bidez, autobidetik datorren erreietako bat kenduko da.

N-644 errepidetik A-8ra (Kantabriarako noranzkoan) irteteko adarra

BI-644 errepidetik A-8 autobiderantz, Kantabriarako noranzkoan, lotzeko adarrak, gaur egun, erradio gutxiko kurba bat eta sartzeko ziri oso txikia ditu, eta horrek zaildu egiten du autobidearen abiadurara egokitzea. Diseinu hori hobetzeko, BI-644 errepidearen enborretik zuzenean irteteko adar bat ezarriko da, bihurgunearen trazadura berria egingo da, bai oinplanoan bai peraltean, eta autobidearen enborrari gehitzeko ziria zabalduko da. Abiadura aldatzeko 175 metroko erreia eta sartzeko beste 125 metroko ziria izango ditu.

Lanak gauez egingo dira, trafikoari ahalik eta kalte gutxien egiteko

Jarduketa horiek egiteko behar diren lanak behar bezala seinaleztatuta egongo dira, eta, ondorioz, abiadura-mugak murriztuko dira obretan dauden zatietan. Bidea edo erreia moztu behar badira, gauez egingo da, zirkulazioan ahalik eta inpaktu txikiena eragiteko. Era berean, helburu horrekin, jaiegunak eta oporraldiak aprobetxatuko dira horrelako lanak egiteko.