BILBO. Hurrengo asteazkenetik aurrera, uztailak 1, eta abuztuaren 31ra arte, lagundutako bainuen zerbitzua eskaintzen hasiko da Bizkaiko hainbat hondartzetan. Asteazkenean La Arena, Ereaga eta Plentziako hondartzetan eskainiko da zerbitzua, eta ostegunetik aurrera Laidatxu, Isuntza eta Arrigorrin. Ekimen hau Bidaideak irabazi-asmorik gabeko erakundeak kudeatzen duen 'Hondartza denontzat' programaren barruan dago, Bizkaiko Foru Aldundiak eta BBK-k finantzatutakoa.
21 begiralek zainduko dute zerbitzua, 11:00etatik 19:00etara. Hondartza denontzat egungo egoerara egokitzearen barruan, instalazioetako edukiera murriztu egiten da osasun-agintariek ezarritako segurtasun-distantziari eusteko, eta zerbitzua gaitzen duten plataformetan dauden pertsona guztiek musukoa eraman beharko dute. Halaber, komeni da pertsona horiek beren laguntza pertsonaleko baliabideekin -formala edo informala - joatea programaren aldagelak erabili behar dituztenean.
Laguntza teknikoen mailegu-zerbitzuak indarrean jarraituko du beste urte batzuetan bezala eta programako profesionalek egingo duten bainu lagunduarena ere indarrean egongo da. Laguntza tekniko horiek eta instalazioak etengabe higienizatuko dituzte zerbitzua ematen duten begiraleek.
Instalazioetan egoteko denbora-muga osasun-agintariek herritar guztientzat hartzen duten berbera izango da, eta zerbitzuaz gozatu nahi duten sei pertsonatik gorako talde guztiek aldez aurretik erreserba egin beharko dute nahitaez, 94 426 66 00 telefono-zenbakiaren bidez edo info@bidaideak.org helbide elektronikoaren bidez. Zerbitzu guztiak, garraio-zerbitzuak barne, urtero bezala ematen jarraituko dira.
