Konfinamendua arintzeko

BBK Salak "online" kontzertuak eta umorezko ikuskizunak programatu ditu zuzenean, konfinamendua arintzeko eta euskal kulturaren sektoreari laguntzeko

BBK Salaren webguneak eta Telebilbao kateak zuzenean emango dute ostegun honetan BBK Sala Etxean ekimenaren lehen ikuskizuna, eta bertan lehen mailako euskal artistak eta taldeak izango dira.

08.04.2020 | 12:07
Iñaki Uranga izango da ekimen honetako lehen artista

Iñaki Urangak eta Doctor Deseok ostegun eta ostiral honetan bertan emango diote hasiera, 22:00etatik aurrera, zuzeneko saio birtual honi, euskal kultura-sektoreko eragile eta enpresei laguntzeko, eta, aldi berean, kultura herritar guztiei doan eskaintzeko.

BBK Sala prest dago koronabirusaren ondorioz kultura ez eteteko edo bertan behera ez uzteko, eta, horregatik, "online" programazioa jarri du abian, musikaz, umoreaz eta antzerkiaz zuzenean gozatzeko. BBK Sala Etxean sortu da, euskal kultura-sektoreari bultzada txiki bat eman gura dion egitasmoa, baita herritarrek doako kalitatezko ikuskizunez internet bidez goza dezaten lagundu ere.

Iñaki Uranga eta Doctor Deseo izango dira lehen bi emanaldietako protagonistak ostegun eta ostiral honetan, hurrenez hurren, 22:00etatik aurrera. Eñaut Elorrieta, Izaro, Belako, Shinova eta El Menton de Fogartyren musika, eta Gorka Aginagalde edo Bocabeats bikotearen umorea ere baieztatu ditu BBK Salak hurrengo hitzorduetarako.

Gizarte-konfinamenduaren ondorioz kultura-guneak ixteak kalte handia egiten die kultura-eragileei, eta horregatik, modu birtualean bada ere, bere kultura-agertoki nagusia berriro irekitzea erabaki du BBK-k, eta kalitatezko programazioa eskaintzea bai biztanle gehienek bizi duten bakartzea jasaten laguntzeko eta bai sektoreari berari laguntzeko ere.

BBK-k bere jarduera-ildo nagusien artean du kultura bultzatzea. Hor daude, adibidez, soilik musikaren atalean, BBK Live, BBK Music Legends, Jazz, Flamenko, Fado, musika klasiko, Emakumeok (emakumezkoen talde edo bakarlariak) zikloak, Getxoko Folk eta Jazz jaialdiei emandako babesa, edo BBK Soinu Berriak lehiaketa talentu gazteak aurkitzeko.

Dagoeneko ezagutzen diren arrazoiengatik, martxoan eta apirilean programatuta zituen ziklo handiak edo kontzertuak atzeratu egin behar izan ditu BBK Salak, eta BBK Sala Etxean baliozko ordezkoa da zuzeneko kulturaz gozatzen jarraitzeko, bai herritarren gozamenerako eta bai konfinamenduaren eta gizarte-bakartzearen ondorioz jada zailtasun ekonomiko handiak dituen euskal kultura-sektoreari laguntzeko.

BBK Salaren webgunearen eta TeleBilbao telebista-katearen bidez jarraitu ahal izango dira ikuskizunak. BBK Sala Etxean jaialdi berria da, eta bere programazioa zabalduz eta artista berrien parte-hartzea baieztatuz joango da datozen egunetan.

Ekimen hau sektorean izaten ari den harrera ona nabarmendu gura du BBK-k, eta hau gauzatzeko artistek eta kultura-eragileek duten prestutasuna eskertu.

Programazioa

Apirilak 9: Iñaki Uranga
Apirilak 10: Doctor Deseo
Apirilak 17: Mabu
Apirilak 18: Belako
Apirilak 19: Bocabeats
Apirilak 24: Eñaut Elorrieta
Apirilak 25: Anne Etxegoyen
Apirilak 26: Gorka Aginagalde

Maiatzak 1: Izaro
Maiatzak 2: Gari
Maiatzak 3: Gurutze Beitia
Maiatzak 8: Mikel Erentxun
Maiatzak 10: Maribel Salas
Maiatzak 15: Mentón Fogarty
Maiatzak 16: Alex Ubago
Maiatzak 17: Jon Apaolaza
Maiatzak 22: Shinova
Maiatzak 23: La bien querida
Maiatzak 24: Oscar Terol

Webguneko saioak

Halaber, BBK Salaren webguneak (www.salabbk.eus) grabatutako beste emanaldi batzuk ere emango ditu, honako artista hauenak, alegia:
- MOBY DICK. Apirilak 15
- ANNE ETCHEGOYEN. Apirilak 20
- GHERO (antzerkia). Apirilak 22
- BENITO LERTXUNDI. Apirilak 27
- UTZI MEZUA (antzerkia eta magia). Maiatzak 4
- INONDIK INORA (antzerkia eta solasaldia). Maiatzak 6