Bizkaia

Mugikorrarekin eta contactless txartelekin ordaindu ahal izango da Bizkaiako ordainpeko autobideetan

Inberbiakek 4,5 milioi euroko inbertsio bat egingo du 119 errepideetan ordainketa-sistema digitalizatzeko

17.12.2019 | 19:52
Imanol Pradales.

Inberbiakek 4,5 milioi euroko inbertsio bat egingo du 119 errepideetan ordainketa-sistema digitalizatzeko

BILBO. Bizkaiako ordainpeko errepideetan mugikorrarekin edota contactless txartelekin ordaindu ahal izango da. Horretarako, Interbiakek 4,5 milioi euroko inbertsioa egin du, eta horri esker Metropoliaren Hegoaldeko Saihesbideko eta Artxandako tuneletako errepideetan dirurik gabe ordaindu ahal izango dute erabiltzaileek.

Interbiakek ordainpeko errepide guztietan digitalizatze-lanei heltzeko kontratuaren lizitazioa onartu berri du; hain zuzen, errepide bakoitzeko txartel-irakurgailua aldatzeaz gainera, ordainleku bakoitzaren eta kreditu-txartelak kudeatu eta ordainketa baimentzen duten erakundeen arteko lotura hobetuko da; beraz, eragiketa bizkorragoa eta seguruagoa izango da. Eguneratze hau egiteko aurrekontu zenbatetsia 4,5 milioi euro da. Inbertsio horri esker, Interbiakek txartel bidez ordaintzeko sistemak berrituko ditu: erabiltzaileek eskatutako teknologiak sartuko ditu, eta AP-8ko, MHSko eta Artxandako tuneletako ordainpeko errepideetan instalatutako aparatuak homogeneizatuko.

Pradalesek adierazi duenez, contactless txartelen edo mugikorraren erabileraren bidez espero dute txartela baliatzen duten erabiltzaileek ordainketa-eragiketak azkarrago egitea. Gaur egun, Bizkaiko ordainlekuetan egiten diren ordainketen % 20n sistema hori erabiltzen da. Halaber, txartel bidezko ordainketa erakargarriagoa izan daiteke autobidea eskudirutan ordaintzen dutenentzat. Ordainketa guztien % 15 eskudirutan egiten da. Bi sistema horiek alde batera utzita, bidaia gehienak, % 65, Via-T sistemaren bidez ordaintzen dira. Sistema horrek, gainera, aukera ematen du dirulaguntzen programari heltzeko, zeinak muga bat ezartzen duen Interbiakek kudeatutako autobideetan hileko ordaindu beharreko zenbatekoan.

Gaur egun, ordainpeko errepideetan txartel magnetikoak besterik ez da onartzen; gainera, irakurgailuan sartu behar dira ordainsaria ordaintzeko. Aurreikusitako aldaketaren bidez, contactless sistemako txarteletara egokituko da, baina oraingo sistemari eutsiko zaio txartel-mota hori ez daukaten erabiltzaileentzat. Gainera, eskudirutan ordaintzen jarraitu ahal izango da.

Onura gisa, ordainsaria txartel bidez ordaindu eta Bidesaria zerbitzuan (fakturak kudeatzeko) erregistraturik dauden erabiltzaileek ia aldi berean eskuratu ahal izango dute, Interbiaken web orrian, ordainlekuetan txartelaren bidez egin dituzten mugimenduei buruzko informazioa.

noticias de deia