Bilboko Udal Etxebizitzak erakundeak saria jaso du Etxebizitzaren eta Lurzoruaren Kudeatzaile Publikoen Espainiako Elkartearen partetik (AVS), 'Next Generation' programaren kategorian. Arrazoia? Otxarkoaga auzoko 84 etxebizitza terrazen bidez handitzeko jarduketa.
Bestalde, Surbisak aipamen berezia jaso du 40. urteurrenaren ospakizunagatik. Aintzatespen hori AVSk atzo Santa Cruz de Tenerifen egin zuen Urteko Batzarraren testuinguruan egin da. Batzarrean, Bilboko Udalaren ordezkaritza batek parte hartu zuen, Yolanda Díez Etxebizitzako zinegotzi eta Udal Etxebizitzak-en presidentea eta Jon Bilbao Hiri Berroneratzeko zinegotzi eta Surbisako presidentea buru.
Epaimahaiak nabarmendu du proiektu hau berritzailea eta aitzindaria dela, Bilboko auzo horretan birgaitzen ari diren eraikinetan dauden tamaina txikiko etxebizitzen bizigarritasuna hobetzeko orduan.
Adierazpenak
Etxebizitza Saileko zinegotzi eta Udal Etxebizitzak-en presidenteak eskerrak eman ditu sariagatik, eta, adierazi duenez, "AVS bezalako elkarte baten aintzatespenak, etxebizitzaren problematikari buruz duen ezagutza eta eskarmentua kontuan izanik, bide honetatik jarraitzera animatzen gaitu, etxebizitza publikoen birgaitzean soluzio irudimentsuak aurkeztuz eta bizilagunei erosotasun handiagoa ematen lagunduz".
Jarduketa horren bidez, etxebizitza bakoitzaren azalera heren bat handitu da gutxi gorabehera, 12 metro inguruko terraza ipinita. Eraikin horiek Txotena kalean (hiru atari) eta Irumineta kalean (lau atari) daude, eta birgaitze-lanak "Orain Otxar" proiektuaren barruan daude.
Proiektua 2024ko azaroan hasi zen eta duela gutxi amaitu da. Europar Batasunaren "Next Generation" funtsen finantzaketa jaso du, Espainiako Gobernuaren Suspertze, Eraldatze eta Erresilientzia Planarekin lankidetzan, Eusko Jaurlaritzako Etxebizitza eta Hiri Agenda Sailarekin bat etorriz.
