Bilbao Izan programa Arabella auzora iritsi da

Arabella auzoa izango da Bilbao Izan programaren edizio berriaren egoitza maiatzean. Bilboko Udalak hainbat bisita gidatu antolatu ditu, 'Ezagutu oinez' izenburupean, auzoaren ondarea eta historia zabaltzeko helburuarekin. Programa Santutxura iritsiko da ekainean, eta Abandora uztailean.

Arabellak hartuko ditu maiatza honetan egingo diren lehen bisita gidatuak. Ekimen honetan parte hartu ahal izateko, aldez aurretik beharrezkoa izango da plaza erreserbatzea webgunearen bidez. Maiatzeko lehen bi asteetarako erreserbak maiatzaren 4tik aurrera, 9:00etatik aurrera egin ahal izango dira, eta bigarren hamabostaldirakoak, berriz, maiatzaren 18tik aurrera, 9:00etatik aurrera. Udal ekimenaren barruan auzo honetan egiten den ibilbidea lehendabizikoa izango da.

Aire libreko ibilbideak dira, oinezkoak eta doakoak, gutxi gorabehera ordubete eta erdiko iraupena dutenak. Ibilbidea atsegina eta erraza da, eta parte-hartzaileak gidari batek lagunduta ibiliko dira; gidariak eduki historikoak modu sinple eta argigarrian azalduko ditu.

Arabella auzoa

Arabella Bilboko eremu berezia da, eta hiria XX. mendearen bigarren erdialdean izan zuen hiri‑hedapena ulertzeko aukera ematen du. Hazten ari zen biztanleriaren etxebizitza‑beharrei erantzuteko planifikatutako auzo gisa sortu zen Arabella, eta gaur egun nortasun propioa du, auzoko bizimoduak eta bere espazioen eguneroko erabilerak markatua.

Ibilbidean zehar auzoko kale eta plazetatik igaroko da, haren eraikuntza‑prozesua eta ingurunearen eraldaketa ezagutzeko; izan ere, Artxandako magaletan dagoen eremu hori lehen bideek eta landa‑guneek hartzen zuten. Ibilbideak aukera emango du auzoko eguneroko bizimodua lehen urteetatik gaur egunera arte nola garatu den ezagutzeko, baita denboraren poderioz izan dituen aldaketa sozial eta urbanistikoak ere.

Bisita gidatuek gutxi gorabehera ordubete eta erdiko iraupena izango dute. Asteazkenetan, 10:00etan eta 12:00etan egingo dira, biak gaztelaniaz; ostegunetan, 16:30ean (gaztelaniaz) eta 18:30ean (euskaraz); ostiraletan, 16:30ean (gaztelaniaz) eta 18:30ean (gaztelaniaz); larunbatetan, 11:00etan (gaztelaniaz) eta 13:00etan (gaztelaniaz); eta igandeetan, 11:00etan (gaztelaniaz) eta 13:00etan (gaztelaniaz).

Erreserba egitean, izena eta abizenak, helbide elektronikoa eta telefono‑zenbakia eman beharko dira. Bisita egin ahal izateko, ezinbestekoa da aldez aurretik izena ematea, eta erreserbatutako egunean eta orduan bisita gidatura joaterik izango ez duten pertsonei eskatzen zaie hori Bilbao Izan plataformaren bidez jakinaraz dezatela, “baja eman” aukeraren bidez, plaza hori beste pertsona batek erabili ahal izan dezan.

Aire libreko jarduera denez, euria eginez gero ez da bertan behera utziko, nahiz eta apur bat moldatu ahal izango den. Bestalde, bisitan zehar entzutea errazteko, parte-hartzaile bakoitzari audiogida bat emango zaio. Horregatik, hasiera‑ordua baino 10 minutu lehenago elkargunera iristea eskatzen da.

Gainera, zeinu‑hizkuntzako interpretea hilaren hirugarren ostiralean, maiatzaren 22an, 18:30ean, egingo den bisitara batuko da. Nobedade gisa, bisita gidatuak zeinu‑hizkuntzako interpretearekin egin behar dituzten pertsonek erreserba egin ahal izango dute horretarako berariaz prestatutako apartatu baten bidez, webgunean bertan, izen‑ematea hasteko lehen egunetik aurrera, maiatzaren 4tik.

Euskaraz bisita gidatua egin nahi duten pertsona partikularrek ostegun arratsaldeetan, 18:30ean, izango dute horretarako aukera. Bestalde, euskarazko taldeentzako bisiten kasuan, gutxienez 15 laguneko taldea osatu beharko dute; horretarako, webgunean bertan horretarako sortutako formulario espezifikoa bete beharko dute, eta, ondoren, taldearekin adostuko da bisitaren eguna eta ordua, eskariaren arabera. Talde berri horiek ere webguneko egutegian argitaratuko dira, eta ostegun arratsaldeetara joan ezin duten baina bisita euskaraz egin nahi duten pertsona partikularrek osatu ahal izango dituzte.

Bisita gidatuak

Maiatzetik aurrera, eta urte amaiera arte, auzotarrek publiko guztientzat doakoak, irekiak eta eskuragarriak izango diren jarduera sorta batez gozatu ahal izango dute.

Bilbao Izan batez ere bilbotarrei zuzenduta dago, baina, aldi berean, hiria bisitatzen duten pertsona guztientzat eta arrazoi desberdinengatik Bilboren ezagutzan sakondu nahi dutenentzat ere irekita dago. Izan ere, udal proiektu honek Hiribilduko auzoen ondarea eta historia zabaltzea du helburu.

Hogei urte baino gehiagoko ibilbidean, ia auzo guztiak ezagutarazi eta bisitatu dira. Hori guztia posible izan da urtez urte aire librean egiten diren bisita gidatu hauetako plaza‑eskaintza osoa betetzen duten Bilboko eta Lurraldeko auzotar askoren parte‑hartzeari eta asistentziari esker.

Ekimen horiek guztiak Bilbao Izan proiektuaren barnean kokatzen dira; hau da, Udalak Bilboren idiosinkrasia osatzen duten hedapen-programa guztiak biltzeko duen proiektua: ibilbide historikoa, ondare kulturala, pertsona garrantzitsuek utzitako aztarna, ondare artistikoa, hiri-konfigurazioa, auzo bakoitzaren historia bereziak, kaleak eta txoko bitxienak, etab.   

Era berean, programa erabat konprometituta dago Bilbao Balioen Hiria, proiektuarekin, Bilboko hirian balio partekatuen esparrua sustatu nahi baitu; tartean, konpromisoa, ahalegina, ilusioa, parte-hartzea, sormena eta, bereziki, identitatea. Halaber, Bilboko Kulturaren 2023-2033 Plan Estrategikoarekin bat egiten du, kultura herritarrengana hurbiltzea sustatzen baitu, hiriaren kultura-nortasunaren ezaugarriei balioa emanez.