Duela aste batzuetatik hona, Zamakolako Haurreskolako bigarren solairua berritze-prozesu betean dago, 0-1 urte bitarteko eta 1-2 urte bitarteko haurrentzat lau gela berri sortzeko. 52 plaza berri, hain zuzen, Bilbon haur-hezkuntza unibertsalizatzeko urrats bat gehiago.
Eider Bilbao Bilboko Hezkuntza zinegotziak azaldu duenez, "2023-2027 agintaldi-planean jasotako konpromisoa betetzen ari gara: hezkuntza goiztiarra indartzea, plaza publiko eta doako berriak eraikiz. Gauzatzeko epea 2025eko abenduaren 31ra arte dago ezarrita, eta 2026ko lehen hiruhilekoan irekitzea aurreikusten da".
400 m2 inguruko azalera librea da, eta indarrean dagoen araudian eskatutako baldintzetan egokituko da. Jardueraren aurrekontua 1.030.617,39 eurokoa da (BEZa barne), eta horietatik % 91 Europar Batasunak finantzatutako Berreskuratze, Eraldaketa eta Erresilientzia Planeko funtsekin finantzatuko da (NextGenerationEU).
"Hezkuntza goiztiarra unibertsalizatzeko lanean ari gara, publikoa eta doakoa. Eskubide hori gauzatu nahi dugu. Bilboko Udaleko Hezkuntza Sailetik lanean jarraitzen dugu haur-eskoletan plaza-kopurua handitzea ahalbidetuko duten espazioak errazteko eta, horrela, familiekin batera ikasleen garapen integrala bermatzeko", gogorarazi du Bilboko zinegotziak.
Bilbo Hezkuntzarekin
Bilbok aurrera egiten du gizatiarragoa, bizigarriagoa, inklusiboagoa eta berdintasunezkoagoa den hiri baterantz, giza garapen iraunkorraren balioen aldeko apustua egiten duen hiri baterantz, hain zuzen ere. Testuinguru horretan, Hiri Hezitzailea den aldetik, "kalitatezko hezkuntza inklusiboa eta ekitatiboa bermatzeko eta guztientzako etengabeko ikaskuntzarako aukerak sustatzeko" lan egiten du, 4. GJHk aitortzen duen bezala, eta bizitza osoan guztiontzako kalitatezko hezkuntza izateko eskubidea bermatzea eta hezkuntzak etorkizun kolektibo jasangarri baterako duen potentzial eraldatzailea baliatzea eskatzen du. Bilboko Udaleko Hezkuntza Arloak bokazio unibertsala duen eskaintza publiko batean lan egiten du.
