Aste Nagusiko berri guztiak, aplikazio ofizialean

Gomendio nagusietako bat aplikazio ofiziala deskargatzea da, udalaren 500 jarduera baino gehiagoren egutegia kontsultatzeko tresnarik azkarrena, praktikoena eta osatuena. iOS eta Android sistemetarako doan eskuragarri, app-ak aukera ematen du egitarau osoa arakatzeko, kategorien edo interesen arabera bilatzeko eta jaiekin lotutako ekitaldiak eta espazioak erraz aurkitzeko.

Udalaren Sare Sozialetako kontu ofizialek — hala nola Bilbao Udala, Bilbao Jaiak, Bilbao Turismo eta Bilbao Kultura — etengabe ematen dituzte Aste Nagusiaren edizio berriaren programazioari buruzko xehetasunak, eta egunero emango dute jaien berri, Bilboko Aste Nagusiko ekitaldi eta une esanguratsuenen testuak, argazkiak eta bideoak etengabe argitaratuz.

Bestalde, udal webgunea ere herritarrentzako informazio-kanaletako bat da jaietan zehar, izan ere, Udalaren webguneak Aste Nagusirako propio prestatutako atal espezifiko bat du, erraz eskuratzeko modukoa.

Jai egunetan, Bilboko Aste Nagusiaren inguruan sortzen joango diren intereseko berriak jasotzeko informazio-atari gisa arituko da webgunea. Berriek baliabide audiobisual desberdinez lagunduta egongo dira, hala nola argazkiak, audioak eta bideoak, eta jaietako egitaraua ere kontsultatu edo deskargatu ahal izango da.

Webguneko edukiei gehitzen zaizkie Udalak posta elektronikoz harpidetuta dauden pertsonei bidaltzen dizkien newsletter edo buletin informatiboak; jaietako egunerokoaren berri izateko modu oso eroso eta erraza da.

Aurrez aurreko informazio-guneak

Aurrez aurre informatu nahi dutenek lau toki ezberdinetara jo dezakete: Aznar eraikineko jai-gunera, Txikiguneko informazio-standera, Plaza Biribileko (Terminus) turismo-bulegoetara edo Guggenheim Bilbao Museora.

Azkenik, edozein kontsulta egiteko, herritarrek 944 010 010 (010) udal-informazioaren zenbakia dute eskura.