José María Larrazabal Alzagaren 'Lily Bilbon', euskarazko bilbainada onenaren kategorian, eta Matías Berrocal Morer-en 'La cuadrilla de Bilbao', gaztelaniazko kategorian, izan dira Bilbainada lehiaketaren 37. edizioko konposizio irabazleak. Bakoitzak 955 euroko saria eta Don Diego oroigarria jasoko ditu. Oraingo honetan 20 parte-hartzaile eta 26 bilbainada aurkeztu dira lehiaketara.
Era berean, zortzi accesit eman zaizkie honako konposizio hauei: 'Susedidos de Bilbao' (Alberto Núñez Baracaldo), 'Bilbotar bikotea' (Juan Carlos Arzamendi Fernández), 'Dena hau da Bilbao!' (Alberto Núñez Baracaldo), 'Si te gustó París' (Natacha Loyola), 'Gabriel Arestiri Gorazarre' (Jon Ander Urkiaga Egidazu eta Josune Barroeta Etxebarria), "Paseando por Bilbao" (Zaira Robles Pérez), 'Del Botxito a Nueva York' (Natacha Loyola) eta 'El Botxo más cuco' (Alberto Núñez Baracaldo). Irabazleek 420 euroko saria eta plaka bat jasoko dute.
Gainera, Bilbao Mapamundi taldeari ohorezko sari bat ematea erabaki da, bilbainaden oraina eta etorkizuna delako.
XXXVII. edizio honetako epaimahaia honako hauek osatu dute: Gonzalo Olabarria (Bilboko Udaleko Kultura eta Gobernantzako zinegotzia), Itziar Urtasun (Jaietako zinegotzi ordezkaria eta Udaleko Kultura eta Gobernantza Arloko albokoa), Amagoia Loroño (Bilboko Akordeoi Orkestrako zuzendaria), Ana Madariaga (Bilbao Musikako kudeatzailea), Eduardo Velasco (Komunikazioko Nerbioi Taldeko zuzendari nagusia) eta Iñaki Uranga (abeslaria).
Sariak ostiralean banatuko dira, Aste Nagusian, Doña Casilda Pergolan, bilbainada kontzertuen ohiko agertokian. Gainera, abenduaren 14an Arriaga Antzokian saritutako konposizioak bilduko dituen diskoaren aurkezpena egingo da.
Bilboko Udalak urteroko lehiaketa beterano honen abesti irabazleak Interneten jartzen jarraituko du, horiek hedatzen laguntzeko. Horrela, Bilbainada lehiaketaren 2025. edizio honetako konposizioak doan entzun ahal izango dira YouTube eta Bandcamp plataformetan grabatu ondoren, bertan aurreko edizioetako abestiak eskuragarri baitaude.
Bilbainadak Bilboko kultura-ondarearen parte dira eta Bilboren, bere iraganaren, orainaren eta etorkizunaren inguruko kontakizuna sortzeko gaitasuna dute. Bilboren nortasun historikoa adierazteko eta zabaltzeko tresna dira, bere kultura- eta ondareari dagokionez, herritarrek nondik datorren jakin dezaten. Bilboko 2023-2033 Kultura Plan Estrategikoan jasotako ildoekin bat datorren kultura-adierazpena eta musika-sorkuntza.
