Argi berdea bizikleta elektrikoen mailegu zerbitzuaren prezio berriak arautuko dituen ordenantzari

Bilboko Udalbatzak hasierako onarpena eman dio bizikleta elektrikoen mailegu zerbitzuaren prezio berriak arautuko dituen ordenantzari, baita Bilbaobizi zerbitzu berriaren erabilera-baldintzak arautuko dituen erregelamenduari ere. Hasierako onarpena eman ondoren, eta oposizioko talde politikoek aurkeztutako 40 zuzenketetatik 18 barne hartuta, hilabete batez jendaurrean jarriko dira, kolektiboen eta herritarren alegazioak jasotzeko.                   

Zerbitzu berria datorren urteko apirilean jarriko da indarrean, hala aurreikusita dago behinik behin, eta bizikleta kopuru bikoitza izango du. Bizikleta berriak izango dira, eta ainguraketa bat izango dute, ibilgailua ekintza bandalikoetatik babesten duen sistema berezi batekin. Ainguraketa-puntu gehiago ere ipiniko dira, uriko goiko auzoetako eskari handiari erantzuteko. Gainera, berrikuntza moduan, estazio birtualak jarriko dira zerbitzuaren erabilgarritasun-behar puntuak estaltzeko, hala nola ekitaldietan, obretan edo jardueretan.

Zerbitzu berria martxan jarri aurretik, 2 astez eten egingo da bizikleten mailegua, ainguraketa-puntu guztiak aldatu ahal izateko. 

Ohikoa eta noizbehinkakoa

Zerbitzuaren berrikuntza nagusietako bat erabileraren araberako prezioen eskema berri bat da, bizikleta ohiko garraiobide gisa fidelizatu eta sustatu nahi duena, eta, aldi berean, sistemaren iraunkortasuna bermatzen duena. Izan ere, erabilera-maiztasun handia dela eta (bizikleta bakoitza egunean 16 aldiz erabiltzera iritsi da), erabilgarritasun-zailtasunak sortu dira.

Beste udalerri batzuetako bizikleten mailegu-zerbitzuak alderatu eta aztertzeko merkatu-azterketa zabala egin ondoren, eta Bilbaobiziren egungo ibilbideak eta erabilera-denborak aztertu ondoren, eredu horren alde egin da. Eredu horrekin intermodalitaterantz jo ahal izango da eta garraiobide jasangarri eta osasungarri hori gehien erabiltzen dutenak sarituko dira.

Eredu berrian tarifa bereiziak izango dituzte ohiko eta noizbehinkako erabiltzaileek, eta horrek aukera ematen du zerbitzua erabilera-denboraren arabera modulatzeko.

Ohiko erabiltzaileek urteko 25 euroko kuota ordainduko dute eta noizbehinkakoek, urteko 10 eurokoa.

Ohiko erabiltzaileen abonoa kontratatzean, erabilera bakoitzeko kuota gehigarria, erabilitako denboraren arabera, onuragarriagoa izango da noizbehinkako erabiltzaileen kasuan baino. Horrela, bizikleta garraiobide gisa erabiltzea sustatu nahi da.* Ikusi taula.

Nora Abete alkateorde eta Mugikortasun eta Jasangarritasun Saileko zinegotziaren iritziz, "Bilbaobizi zerbitzua funtsezko elementua da Bilboko Udalaren mugikortasun jasangarriko estrategian. Horren bidez, garraiobide ez-kutsatzaileen erabilera sustatu nahi dugu, osasun publikoa hobetuz eta emisioak murriztuz". Ildo horretan, zehaztu duenez, "tarifen doikuntza eta ordenantza berria ezinbesteko urratsak dira zerbitzu horren epe luzerako jasangarritasuna bermatzeko eta bizikletaren erabilera indartzea, ibilgailu pribatuaren alternatiba eraginkor gisa".

Zerbitzuaren beste berritasun bat ordaintzeko modua da, zeina soilik izango baita aurreordainketako, kredituko edo zordunketako txartelaren bidez, transakzioari segurtasun-berme handienak emateko.

Ildo horretan, azken testuan partzialki onartutako zuzenketetako baten arabera, bihar-etzi ordaintzeko beste modu batzuk ere onartu ahal izango dira, alegia, Bizkaiko lurralde historikoko garraiobide publikoetan erabiltzen direnak eta Bilbaobizi zerbitzuan integratu daitezkeenak, hala nola Barik txartela.

Martxotik aurrera, erabiltzaileek herritarren arretarako bulego bat eta aplikazio bat izango dituzte eskura, urteko ordainketak kontratatzeko eta zerbitzu berriaren funtzionamenduari buruzko informazio espezifikoa jasotzeko.

Abonamendu-sistema berrirako trantsizioa errazteko, 2025eko urtarrilaren 1etik aurrera ez da alta berririk egingo zerbitzuan, baina daudenak berritu ahal izango dira. Egungo zerbitzua amaitzean, zerbitzuaren erabiltzaile guztiek kontratatutako baina erabili gabeko ordainketa-aldiari dagokion dirua jasoko dute.

Bilbaobiziren erabiltzailearen profila

2023an, bizikleta elektrikoen udal-zerbitzuak bi milioi baino mailegu edo alokairu gehiago egin zituen, hau da, duela 10 urte lortutako kopurua (260.000 izan ziren 2013an) bider 10.

Zerbitzuan alta emandako pertsonen kopurua goraka doa urtetik urtera (gaur egun 25.000 pertsona baino gehiago daude alta emanda zerbitzuan), eta asmoa da joerari eustea eta, bereziki, zerbitzuaren ohiko erabilera sendotzea. Azken 10 urteotan, Bilbaobiziren erabilera 10 aldiz handiagoa da; izan ere, 2013an erregistratutako 260.278 erabileretatik 2023an 2.000.000 erabileratik gora izatera iritsiz.

Gaur egun, zerbitzuko alta emanda dauden pertsonen %54 erabiltzaile ohikotzat hartzen dira, astero 4 alokairu baino gehiago egiten dituztelako. Zerbitzu bakoitzean erabilitako denborari dagokionez, erabiltzaileen %74k gehienez 15 minutuz erabiltzen dute bizikleta.

Profilari dagokionez, erabiltzaileen % 68k 34 urte baino gehiago dituzte, eta horietatik % 6k 64 urte baino gehiago. Generoari dagokionez, erabiltzaileen % 42 emakumeak dira, eta % 58 gizonak.