Bilboko Udalak 1.322.711,91 euroko aurrekontua bideratuko du Iturribide kalean berrikuntza- eta egokitze-lanak egiteko. Obrak Lan horien helburua kaleari estetika modernoagoa eta atseginagoa ematea da. Aurrekoetxea plazaren arteko bidegurutzetik –Iturribideko 61. eta 78. zenbakien inguruan– Zazpi Kaleetaraino –37. eta 46. zenbakietan jardungo da, eta sei hilabeteko egite-epea izango dute.
Kalearen ingurua egokitzeko, hainbat jarduketa aurreikusten dira:
- Dauden zutoin guztiak kentzea eta galtzada mugatzen duten elementu horien ordez oinezkoentzako altzari atseginak jartzea, hala nola hormigoizko eserlekuak (egurrezko bizkarraldearekin eta bizkarrik gabe) edo eserlekuak dituzten jardinerak, besteak beste.
- Espaloien zoladura erabat berritzea.
- Argiztapena hobetzea, hormako luminarietatik luminaria bertikaletara pasatuz eta argien banaketa homogeneoagoa eginez.
- Bizikleten erabilera sustatzeko bizikleta-aparkalekuak jartzea.
- Galtzada handitzea, kale osoa kota berean berdintzeko eta, horrela, kalearen irudia handitzeko, oinezkoei lehentasuna emanez.
Era berean, hirigintza-hobekuntza integrala egiteko, bai ibilgailuen trafikoarena bai eragindako zerbitzuena, hauek ere egingo dira:
- Galtzadaren zabalera 3,50 metrora murriztea modu jarraituan kalean esku hartuko den eremu osoan, galtzadaren bi aldeetako aparkalekuak kenduz.
- Espaloiak handitzea, lehengo aparkalekuen espazioa irabaziz.
- Kale azpitik doan lurpeko galeria egokitzea, hura iragazgaitziz.
- Euri-uren sarea aldatzea, galtzadaren bi aldeetan granitozko bi areka eginda, kutxatilak doituta, hustubide berriak eginda, etab.
- Gas- eta telefonia-sareak erabat berritzea, trazadura partekatzen baitute.
Zoladurak, argiak eta hiri-altzariak
Oinezkoentzako zoladuretarako, hainbat soluzio erabiliko dira: granito erako lauza hidraulikoa eta baldosa podotaktila lehenengo jarduketa-eremuan, eta galtzada-harri granikoa eremuaren amaieran, Zazpi Kaleetako oinezkoentzako gunearen loturan, horrela galtzada-harrizko bilbea mantenduz.
Bestalde, asfalto inprimatua erabiliko da galtzadaren eremurako. Dekorazio-teknika jasangarria da eta galtzada-harrizko bilbea imitatzen du, oinezkoen gunea izatearen sentsazioa handitzeko.
Gaur egun, argiztapen-lerro bik zeharkatzen dute, luzetara, kale osoa, espaloi bakoitzeko bat, lurpeko sarearen bidez. Eta, luminaria bat izan ezik (52. atariaren parean dagoen zutoina), guztiak daude fatxadetan ainguratuta.
Horregatik, argiztapena erabat berritzea proiektatu da. Horrela, luminariak espaloiko zutabeen gainean muntatuko dira. Kutxatilak ere berritu egingo dira, baita lerroa bera eta kableak ere, eta erabat lurperatuko dira.
Gainera, zuntz optikoa hedatzeko hodi gehigarri bat erabiliko da.
Hiri-altzariei dagokienez, esku-hartzearen eremuan 26 eserleku jarriko dira, hiru eredu desberdinetakoak: 8 hormigoizkoak izango dira, beste 8 hormigoizkoak egurrezko gainestaldurarekin, eta beste 10 hormigoizkoak, egurrezko estaldurarekin eta bizkarraldearekin.
Era berean, 6 paperontzi berri jarriko dira, bizikleta-aparkaleku bat –10 plazako edukiera duena, Maristen ikastetxerako sarbidea ematen duen plazan kokatua–, eta 31 jardinera, altuera aldakorrekoak eta 0,7 metroko diametrokoak, gris koloreko hormigoi prefabrikatuz egindakoak. Landare aromatikoak landatuko dira, hala nola begonia eta izpilikua.
5 jardinera-eserleku jarriko dira, horietako hiru Maristen ikastetxearen azpiko plazan; eta 5 txorko jarriko dira, hazkuntza erradikal kontrolatuko sistema daukatenak. Horietan 5 zuhaitz berri landatuko dira (astigarrak).
Obraren faseak
Obra-plana faseka ezarriko da, eragozpenak minimizatzeko.
Lehenik eta behin, aparkaleku-partzelak kendu egingo dira; horretarako, aldez aurretik ibilgailuak kaletik atera beharko dira.
Ondoren, bidea lau gunetan banatuko da, lanak modu ordenatuan egiteko. Ibilgailuak bertatik igaro ahal izango dira beti, eta oinezkoak dendetara eta eraikinetara sartu ahal izango dira. Gutxienez metro bateko zabalerako zerrenda bat utziko da fatxadatik fase guztietan, eta altzairuzko xaflak jarriko dira tarte hori egiten denean, sarbidea ahalbidetzeko.
Asfaltatze-unean bakarrik aurreikusten da kalea ixtea, eta lan hori gau bakar batean egingo da obra amaitzean, ibilgailu pribatuen eta Bilbobusaren A2 linearen zirkulazioa ahalik eta gutxien oztopatzeko; izan ere, autobus hori abian izango da obrak irauten duen bitartean. Larrialdietako ibilgailuen zirkulaziorako ere ez da oztoporik izango.
Horren aurretik, esku hartuko den eremu osoan hiri-elementuak jasotzea proiektatzen da, luminariak izan ezik, horiek amaieran kenduko baitira, berriak martxan daudenean.
