Genero-berdintasunean eragin positiboa izango dute Durangoko aurrekontuek

Proiektu honen helburu nagusia aurrekontuak egokitzea da, Durangoko Udalaren aurrekontuan genero-berdintasuna pixkanaka integratzea ahalbidetuz. Halaber, metodologia bat garatu nahi da aurrekontuaren genero-eraginaren aurretiazko ebaluazio-txosten bat egiteko. Horri esker, aurrekontu-erabakiek emakumeei eta gizonei nola eragiten dieten modu argi eta gardenean aztertu ahal izango da. Lehen aurrekontu honetan gastuari erreparatuko zaio, eta sortzen diren beharren arabera egokituz joango den proba pilotua izango da.

Prozesua hiru fasetan

Lehenengoa dagoeneko hasi da, eta proiektuan aurrera egiteko beharrezko baldintzak prestatzea du helburu. Hasierako fase honetan lan-plana aurkeztu eta onartuko da, proiektua koordinatzeaz arduratuko den talde eragile bat sortuko da, eta Udalaren egungo aurrekontu-dokumentazioaren azterketa xehatua egingo da.

Bigarren fasean, udalerriaren ezaugarri eta beharretara egokitutako metodologia garatuko da, aurrekontuan genero-ikuspegia txertatzeko helburuarekin. Fase honetan zirriborro bat egingo da proposamen metodologikoekin eta beharrezko tresnekin, baita metodologia formalizatzeko prozesuaren itxiera eta definizioa ere.

Azkenik, hirugarren fasean proposamen metodologikoa onartuko da. Onartu ondoren, barne-hedapeneko prozesu bat egingo da.

Jesica Ruiz, Durangoko Udaleko Berdintasun zinegotziak, nabarmendu duenez: “beste urrats bat ematen dugu emakumeen eta gizonen arteko berdintasun erreal eta eraginkorrerantz. Durangon ezarriko diren politika publikoak herritarren beharretara egokitzeaz gain, oraindik dauden genero arrakalak murrizten ere lagundu nahi dugu. Era berean, Udal langileen inplikazioa eskertzen dut prozesuan. Aurrekontuen ikuspegi integral hori funtsezko tresna da gizarte bidezkoago eta berdintasunezkoago baterantz aurrera egiteko".