BILBO. Atzo arratsaldeko zortziak aldera, Portugaleteko San Roque auzoko taberna baten inguruan ezarritako zaintza-dispositibo berezi bateko Muskizeko Ertzain-etxeko agenteek gizonezko bat ikusi zuten lokalean sartzen, eta pixka batean barruan egon ondoren alde egiten.
Ertzaintza establezimendua kontrolatzen ari zen, jasotako hainbat informazioren arabera bertan substantzia sorgorgarriekin trafikatzen ari zitezkeela eta. Gainera, aurreko egunetan egindako zaintza-lanetan agenteek hauteman zuten tabernan sartzen zirenak, eta gutxi batzuk izaten ziren, kasurik gehienetan presaka irteten zirela, ezer kontsumitzeko astirik izan gabe.
Hori dela eta, operatiboko agenteek tabernaren kanpoaldean geldiarazi zuten aipatutako bezeroa, eta egiaztatu zuten substantzia prentsatu baten zati bat zeramala, marroia, segur aski haxixa, eta egiaztatu ahal izan zuten tabernan erosi berri zuela. Horren aurrean, agenteek lokalean sartu eta arduraduna identifikatu zuten, eta sukaldean, ke-kanpaiaren gainean ezkutatuta, haxix-tableta bat aurkitu zuten.
Beste apal batzuetan doitasun-balantza bat eta trafikatzaileek erabili ohi dituzten beste objektu batzuk ere aurkitu zituzten, eta agenteek konfiskatu egin zituzten hainbat dirurekin batera. Beharrezko frogaketak egin ondoren, ustezko trafikatzailea atxilotu egin zuten eta polizia-egoitzara eraman zuten.
Behin beharrezko izapideak amaitzen direnean, datozen orduotan eramango dute Agintaritza Judizialaren aurrera.
