Eudel Euskadiko Udalen Elkarteak eta Emakunde Emakumearen Euskal Erakundeak 'Berdinsare(H)abian' programa jarri dute martxan, 7.000 biztanle arteko udalerriei berdintasunaren aldeko tokiko politikak ezartzen eta finkatzen laguntzeko ekimen bateratua. Helburua da Euskadiko lurralde osoan Emakumeen eta Gizonen Berdintasunerako Legea "benetan bete dadin erraztea", eta, hala, EAEko herritarren %100i estaldura ematea.
Esther Apraiz Eudeleko elkarteburu eta Derioko alkatea eta Miren Elgarresta Emakundeko zuzendaria 7.000 biztanle arteko 194 udalerrietako ordezkaritza politikoarekin egindako topaketaren buru izan dira asteazken honetan Iurretan (Bizkaia), Oskar Koka bertako alkatearekin batera.
EAEko 7.000 biztanle baino gutxiagoko udalerriak erkidegoko %76 dira; asko Arabako kuadrilletan biltzen dira, eta, Bizkaiaren eta Gipuzkoaren kasuan, mankomunitateetan eta beste elkarte batzuetan.
Ekitaldian azaldu dutenez, Berdintasunerako Euskal Legeak ezartzen du tokiko erakunde guztiek, edozein tamainatakoak direla ere, berdintasuna bultzatzeko berariazko egiturak izan behar dituztela, langile tekniko espezializatuekin, dedikazio egokiarekin eta behar besteko baliabideekin. Hala ere, baldintza horiek erronka handia dira populazio txikieneko udalerrientzat.
Egoera horri erantzuteko, Eudelek eta Emakundek, Berdinsarea udalerrien sarearen bitartez, "laguntza eta babes hobea" emango diete udalerri txikiei, beren berdintasun egiturak antolatzen eta beren eskalara egokitutako politika publikoak hedatzen laguntzeko eta horiek babesteko.
Esther Apraizek nabarmendu duenez, "udalerri txikiek komunitatearen kontzientzia handiagoa dute, eta berdintasun politiketarako berrikuntza guneak izan daitezke, bizikidetzako eta tokiko eskalako herritartasun inklusiboko laborategiak".
"Berdinsarearen bidez, Eudelek eta Emakundek gure konpromisoa berresten dugu, udalerri guztiek parte har dezaten berdintasunaren euskal estrategiaren aurrerapenetan; pertsona guztiek, bizi diren tokian bizi direla, ekitatea, erantzukidetasuna eta indarkeria matxistaren prebentzioa sustatzen duten tokiko politiken onura jaso dezaten", ziurtatu du.
Era berean, Miren Elgarrestak EAEko biztanleria txikieneko udalerrietan berdintasuna bultzatzeko asmoz Berdinsareak hasieratik egindako lana azpimarratu du, eta zehaztu du 'Berdinsare(H)abian' ekimen berria 7.000 biztanletik beherako udalerriei zuzentzen zaiela, "haiek baitute baliabide gutxien eta zailtasun gehien beren berdintasun politikak garatzeko eta finkatzeko".
Gogorarazi duenez, Berdintasunerako Legeak aurreikusten du erkidego mailako administrazioak eta foru administrazioek ahalmen gutxiagoko udalerriei laguntzea berdintasunaren arloan dituzten eskumenak gauzatzen.
