Urriaren 5ean eta 6an

Bizkaiko Foru Aldundiak eta EHUk Bost Kontinenteetako Landareen Azoka antolatu dute

Asteburu honetakoa bosgarren edizioa izango da, 2015. urtetik urtero egin baita

09.02.2020 | 17:20
Landare usaintsuak eta sendabelarrak, eta miniaturan egindako paisaiak eta egokitutako landareak egongo dira, besteak beste.

Asteburu honetakoa bosgarren edizioa izango da, 2015. urtetik urtero egin baita

BILBO. Bizkaiko Foru Aldundiak eta UPV/EHUk Bost Kontinenteetako Landareen Azokaren V. edizioa ospatuko dute hurrengo asteburuan, hilak 5 eta 6. Bi erakundeek Leioako eta Erandioko udalen eta BBK-ko Gizarte Ekintzen laguntzarekin eraman dute aurrera proiektua. Bertan, munduan zehar aurkitzen diren era guztietako landareak ikusi ahal izango dira. Era berean, landare-ekoizleen arteko elkarpuntua izango da azoka.

2015etik egiten den bezalaxe, ekimena jaio zen urtea, UPV/EHUk Leioa-Erandio eremuan duen Arboretumean egingo da azoka. Urtez urte erakusketari kopurua gorantza doa, eta aurtengoan EAEko, Espainiar Estatuko eta Frantziako 37 erakusketari bilduko ditu.  Bai larunbatean, bai igandean 10.00etatik 18:00etara irekita egongo da. Landare usaintsuak eta sendabelarrak, miniaturan egindako paisaiak eta egokitutako landareak (bonsaiak, landare zukutsuak...), kaktusak, teila gainean landatutako iratzeak, orkidea tropikalak, Hegoafrikako landare erraboildunak, landare haragijaleak; horiek dira, besteak beste, azokan ikusi eta erosi ahal izango diren espezieetako batzuk (gehienak, ezezagunak dira gure ingurunean, baina landatzeko errazak). Aurten ere basoko hazien eta Martintxuneko foru mintegiko landareen erakusketa bat egingo da. Mintegiko landareak interes bereziko eremuak lehengoratzeko erabiltzen dira. Bertoko produktuak dastatzeko txosna bat ere egongo da.

Bertaratzen direnek autobusak izango dituzte Leioako eta Astrabuduako metro-geltokietatik, 10:00ak eta 18:00ak bitartean, hau da, azokako ordutegian. Halaber, bi aparkaleku ere izango dira Arboretumaren alboan. Gainera, antolatzaileek ibilgailu bat eskainiko die mugikortasun murriztua duten pertsonei.

Sarrerak euro bat balio du, baina 12 urtetik beherako neska-mutilak doan sartu ahal izango dira.  Azokara doazenek, gainera, Arboretum-eko bidezidor-sareaz gozatzeko aukera izango dute. Lursail horrek 19 hektarea eta 1,700 zuhaitz ditu, bost kontinenteetatik ekarritako 130 espezietakoak. Arboretum Bizkaiko espazio naturalik garrantzitsuenetakoa da.