Zirrikituetatik begira

Alfonso Alonso

22.07.2020 | 00:22
Alfonso Alonso

GASTEIZKO mihi gaiztoek kontatzen dute, Pablo Casado eta Carlos Iturgaiz Florida parkean hauteskunde kanpaina egiten ari ziren bitartean, Alfonso Alonso lasai asko zegoela taberna batean handik oso gertu. Mihi gaizto gasteiztarrek gaineratzen dute taberna horretan bertan zebilen norbait, lagun adarjotzaile bat agian, guztiok dugun ezagun maitagarri horietako bat beharbada, Alonso jaunarenagana hurbildu zela galdetzeko ea ez zuen asmorik Florida parkean agertu, alderdikideak agurtu eta bosteko edo ukondoko batzuk emateko. Mihi gaiztoak ez dira ados jartzen Alfonso Alonsoren erantzunarekin: bertsioak isiltasun hotzenetatik purrustada beroenetara doaz, baina ni ziur nago Alonsok, bizkarrari eraginez, irribarrea eskainiko ziela tabernan bildutakoei eta bere kolkorako pentsatu inozoz inguraturik zegoela. Izan ere, hauteskundeak amaitu bezain laster, jakin dugu Alfonso Alonso popularra edo popular ohia izango dela José Pepiño Blanco sozialista edo sozialista ohiaren aholkularitza enpresaren presidentea.

Politika utzi eta gero, politikari gehienek lanpostu ederrak berehala aurkitzen dutela ez da albistea (ikastaroak eman beharko lituzkete Lanbiden), baina Alonsorenak begi-bistan utzi du mekanismo osoa. Blancoren enpresa, Acento izenekoa, lobby lanak egiten ditu enpresa pribatuen eta erakunde publikoen arteko harremanak errazteko. Horretarako politikari ohiak behar omen ditu, berdin dio zein alderditakoak, transbertsalitate itxura emateko. Hor daude Antonio Hernando, purga baten ondoren kargurik gabe gelditu zena, edo Elena Valenciano, Europako Parlamentuan eserlekurik gabe gelditu zena (Blancori gauza bera gertatu zitzaion), biak sozialistak edo sozialista ohiak, Esteban González Pons popularraren semea eta abar.

Eta orain Alonso (Gasteizko alkatea, Osasun ministroa, EAEko popularren nagusia). Hor ibiliko da, goizean dei batzuk, e-mail gutxi idatzi (horretarako daude idazkariak), lan bilerak, lan bazkariak, lan bidaiak, lan afariak, Gasteiz-Madril, Madril-Gasteiz. Mihi gaiztoek istorio berriak izango dituzte behintzat.