“ekinBarrik ziurgabetasuna hobeto kudeatzen eta modu kolektiboan pentsatzen irakatsi digu”

Bere ibilbidean zehar, etengabeko hobekuntzaren eta pertsona ardatz duen kudeaketaren aldeko apustua egin du, hazkundearen giltzarri gisa Construcciones Zabalandi-k. “ekinBarri gure estrategiaren bilakaera naturala dakarkio gure estrategiari, eta gure enpresa-ikuspegia indartzeko aukera ematen digu, pertsona ardatz duen kudeaketa kolaboratiboago baten bidez”, adierazi du 33 urtez karguan daramatzan Aitor Sourrouille, enpresako gerenteak.

Zabalandi urteak daramatza eraikuntza-sektorean sendotzen. Zein dira zuen jarduera nagusiak eta zer balio bereizgarri eskaintzen du zuen taldeak?

Construcciones Zabalandi eraikuntza-sektorean ibilbide sendoa duen familia-enpresa da. Kualifikazio handiko profesionalen taldea eta makineria propioa dugu. Horri esker, kalitatezko eta eraginkortasun handiko zerbitzuak bermatzen ditugu. Batik bat, eraikuntzan, obra zibilean, hirigintzan eta birgaitzean dihardugu, sektore publikoan zein pribatuan.

Horrez gain, batzuetan, etxebizitza eta pabiloi industrialen sustapenak ere egiten ditugu. Gaur egun, batez ere obra zibilaren mantentze-lanetan espezializatu gara, siderurgia, energia, aeronautika eta lehengaien industriako enpresentzat, baita erakunde publikoentzat ere, hezkuntza-zentroetan, kirol-instalazioetan eta bulegoetan.

Zein izan da Zabalandiren bidea enpresa-kudeaketa hobetzeko? Nola txertatu da ekinBarri bilakaera horretan?

Urteak daramatzagu enpresa-kudeaketaren hobekuntzaren aldeko apustua egiten, eta horren erakusle da Bizkaiko Foru Aldundiaren PREMIE programa, 1995ean martxan jarri genuena. 2012an, berriz, Zilarrezko Q saria jaso genuen. Ondoren ekinBarri gure estrategiaren bilakaera naturala izan zen. Horrela, gure enpresa-ikuspegia indartu ahal izan genuen, pertsona ardatz duen kudeaketa kolaboratiboago baten bidez.

ekinBarri programan parte hartzen duzuenetik, zer aldaketa estrategiko ezarri dituzue eguneroko kudeaketan?

Barne-komunikazioa hobetzeko, eraginkortasuna areagotzeko eta arloen arteko koordinazioa sendotzeko lan egin dugu. Aldaketa nagusietako bat erabakiak hartzeko modua izan da: orain, erabakiak modu deszentralizatuagoan eta adostasun handiagoarekin hartzen ditugu. Aldizkako bilera emankorragoak ere ezarri ditugu, helburu zehatzetara bideratuak.

Barne-kudeaketaz harago, nola eragin du ekinBarrik enpresaren kulturan eta bezeroekin nahiz hornitzaileekin duzuen harremanean?

Konfiantzan eta gardentasunean oinarritutako lan-ingurunea sortzen lagundu digu, kontrol zorrotzaren ordez. Gatazkak hobeto kudeatzen, talde-lana sustatzen eta enpresaren ikuspegi partekatuan zentratzen ikasi dugu. Gainera, gure bezeroekin dugun harremana sendotzen lagundu digu, konfiantzazko eta malgutasuna duen enpresa gisa kokatuz.

ekinBarriTECH datuetan oinarritutako erabakiak hartzeko tresna garrantzitsua da. Nola aplikatzen du Zabalandik proiektuen eta taldeen kudeaketan?

EkinBarriTECH erabiltzen dugu gure prozesuen eta taldeen errendimendua baloratzeko. Tresna horrek informazio objektiboan oinarritutako erabakiak hartzen laguntzen digu, obra bakoitzaren errentagarritasuna, entrega-epeak, produktibitatea eta beste hainbat faktore aztertuz.

Eraikuntza bezalako sektore lehiakor batean, zer abantaila lortu ditu Zabalandik lan-taldearen eredua eta barne-komunikazioa sendotuz?

Talde-lana optimizatu dugu, konfiantza eta komunikazioa indartuz. Orain, bilerak egituratuagoak eta erabilgarriagoak dira. Arlo bakoitza enpresaren helburu orokorren arabera informatuta eta lerrokatuta dagoela ziurtatzen dugu. Gainera, taldean parte-hartze handiagoa lortu dugu, motibazioa eta langileen konpromisoa hobetuz.

Eraikuntza-sektorean lehiakortasuna mantentzeko, estrategia argia izatea funtsezkoa da. Zein dira Zabalandiren lehentasunak bere jasangarritasuna eta hazkundea bermatzeko?

Gure helburua errentagarritasun jasangarria mantentzea, gure tamaina egonkor mantentzea eta eraikuntza-sektorean dugun posizioa sendotzea da. Obraren exekuzioaren eta enpresa industrialetan eta erakunde publikoetan obra zibilaren mantentze-lanen arteko oreka bilatzen dugu, gure bezeroei kalitatezko zerbitzu bat eskainiz, haien leialtasuna irabazteko.

Horrez gain, kudeaketaren bikaintasunaren aldeko apustua egiten dugu, gure jarduerak bai gizartearentzat bai gure lantaldearentzat balioa ematea bermatzeko.

Merkatua etengabe aldatzen ari da. Nola ikusten du Zabalandik bere burua etorkizuneko erronken aurrean?

Eraikuntza-sektorea dinamikoa eta erronkez beterikoa da. Ingurune aldakorra dugu, eta digitalizazioa, jasangarritasuna eta eraginkortasuna giltzarri dira. Gainera, lehiakortasun gero eta handiagoari eta merkatuaren araudi eta eskaera berrietara egokitzeko beharrari aurre egin behar diogu.