Josep Carneri egindako omenaldia jasoko du Arriaga Antzokiak asteartean

Datorren asteartean, ekainaren 13an, arratsaldeko 19.30etik aurrera, David Alegret tenorrak eta Rubén Fdez. Aguirre pianistak Josep Carneri egingo dioten omenaldia jasoko du Arriaga Antzokiko foyerrak. Ekimen hau 'Lied Arriagan' izeneko zikloaren barruan antolatuta dago, eta denboraldiko seigarren eta azken hitzordua izango da.

Puntu eta jarrai izango den kontzertuan, David Alegret tenor katalan ospetsua izango dugu, Rubén Fdez. Aguirre pianistarekin batera. Elkarrekin, omenaldia egingo diote Josep Carner ospetsuari, zeina poeta katalanen printzea bezala baitzen ezaguna; izan ere, funtsezko egilea izan zen bere garaiko musikari askorentzat (Toldrà, Serra, Monpou), baina erreferentziala da ere gaur egungo konpositoreentzat.

Programa honetan, Alegretek eta Fdez. Aguirrek 120 urteko bidaia proposatzen dute, Modernisme català mugimenduaren sorreratik gaur egunera arte. Gainera, IBS Classical diskoetxearekin kaleratu duten Carneriana izeneko CD bikoitza aurkeztuko dute Bilbon. Josep Carnerren olerkiei buruzko 50 abesti biltzen dituen proiektu handi bat da, kritika bikainak jaso dituena eta El Temps de les Arts 2022 sari prestigiotsua lortu duena Musika Klasikoaren kategorian.

Erabateko estreinaldia

Errezitalean, Arriagan bertan, Joan Magrané konpositorea ere izango dugu. Egile katalanak Musika Konposizioko Reina Sofia saria irabazi zuen 2013an, eta musika berria idatzi du Canticel obrarako. Izenburua bat dator Josep Carnerren poema ezagunenetako batenarekin. Izan ere, Alegretek eta Fdez. Aguirrek hainbat egilek poema horri eskainitako zenbait konposizio interpretatuko dituzte. Zehazki, Ricard Lamote de Grignon, Eduard Toldrà, Antoni Massana, Joaquín Rodrigo eta Narcís Bonet musikagileek egindako Canticelen interpretazioak entzun ahalko ditugu. Horiez gain, izen bereko seigarren obra bat gehituko zaio, Joan Magrané-rena, zeina lehen aldiz joko baita zuzenean hilaren 13an, asteartean, Arriaga Antzokiko foyerrean, erabateko estreinaldian.

Egile gehiago programan

Carneriana proiektuak kontzertuaren bigarren zatia hartuko du. Baina David Alegretek eta Rubén Fdez. Aguirrek, errezitalaren lehen zatian, beste egile katalan batzuen piezak interpretatuz osatuko dute programa. Hain zuzen ere, entzuleek Albenizen “Seis baladas italianas” zikloko zenbait konposizioren interpretazioaz gozatuko dute eta, ondoren, 1922an argitaratutako Tomás Garcésen “Vint cançons” liburuko bost poematik igaroko dira.