Ibai Aizpuruak Sormen Beka irabazi du 'Barraka' bideojokoarekin

Irundarrak 15.000€-ko dirulaguntza jaso du bere proiektua burutzeko

07.12.2021 | 19:59
Sormen Bekaren IV. Edizioan sorkuntza digitaleko proiektu onena saritu da. Argazkia: Oskar M. Bernal

Ibai Aizpurua irundarrak Durangoko Azokako IV. Sormen Beka irabazi du Barraka bideojoko proiektuarekin. "Izugarrizko poza daukat, aukera izugarria delako, behar nuena egiteko aurrerapausu bat", aitortu du diseinatzaile eta programatzaile irundarrak saria jaso ostean.

Sormen beka honi esker, Aizpuruak 15.000 euroko dirulaguntza izango du bere ideia errealitate bihurtzeko urtebeteko epean. Aurtengo bekaren gaia sorkuntza digitala den horretan, proiektuak arlo horrekin bat egiten duten irudi errealak, animazio tradizionala edota stop-motiona dakartza ezaugarri nagusi moduan. Alor praktikoan, ordea, abenturako bideojoko umoretsu bat da. Ainhoa izango da jokoaren protagonista, barraka sorgindu batean sartu eta fantasiazko mundu bitxi batean murgilduko den neska bat.

"Barraka oso proposamen iradokitzaile eta tentagarria da. Haurrentzako fantasiazko mundu estetikoki eder eta gozagarria sortzen du, begiekin jateko modukoa", azaldu du Lorea Arakistainek, epaimahaiaren bozeramaileak. Mundu horri itxura ematen ahaleginduko da Aizpurua datozen hilabeteetan, berak onartu duen moduan, oraindik hasieran dagoelako: "Irudi batzuk daude sortuak, baina programazioa ikutu gabe dago eta ez da prototipo bat existitzen. Bide oso luze bat dago garatzeko, eta urte honek emango dit denbora esperimentatzeko, ni ohituta nagoelako prototipoak asteburu bakarrean sortzera".

Hartara, bideojokoa izango den horri begiratzeaz gainera, Barraka-ren jatorriari ere erreparatu behar zaio, edozein ideiaren atzean arrazoi bat dagoelako ohikoa denez. Kasu honetan, Aizpuruak parke tematikoak zituen buruan hasiera batean, baina zerbait "hurbilagoa" lortzeko intentzioa zeukan. Hori ikusita, soluzio bat topatu zuen laster urrunegi joan gabe. "Bideojokoetan beti daude horrelako topiko handiak, eta barrakekin horiengandik urrundu naiteke, zerbait originala sortu esplorazio joko ideia horrekin", zehaztu du sortzaile irundarrak bere ideiaren harira.

Momenturako sortua Ibai Aizpuruaren Barraka proiektuak ez du oraingoz ibilbide luzerik, diseinatzaile eta programatzaile irundarrak beka lortzeko espresuki sortu zuelako duela pare bat hilabete. "Lehenago ez zen existitzen, lehenago banituen proiektuak, bakarrik zein lagunekin, baina Barraka honetarako sortuta dago erabat", adierazi du.

Dena den, bideojokoen sorkuntza ez da Aizpuruaren eguneroko lana, normalean Donostiako Medialaben dabilelako programazioa eta animazioa irakasten, beste gauza askoren artean. Gauzak horrela, bere aisialdia baliatzeko ohitura dauka horrelakoetan ibili ahal izateko. "Beti gustatu zait irudiarekin probak egitea eta gauza ezberdinak esperimentatzea", onartu du bere zaletasunaren harira.

Oraingoan, Aizpuruak berak egingo du bideojokoa ia osotasunean, diseinua, irudiak, animazioa zein programazioa bere gain hartuz. Hori bai, musikari dagokionez, Gonzalo Sardonen laguntza izango du.

Eta bai, gaurkoa zalantza barik momentu polita izan da Aizpuruarentzat, baina bazekien aldez aurretik irabazlea zela. "Gerediaga Elkarteak deitu zidan, bestela gaur ez nintzen hemendik egongo", itxi du irribarre artean.

Más información

noticias de deia