Hazilan programa Txorierrira itzuliko da

Otsailaren 12a eta martxoaren 5a bitartean, EGAZ Txorierrik 15. edizioa jasoko du

20.01.2021 | 00:52
Aurreko Hazilen programako edizioko irudia.

EGAZ Txorierrik Hazilan proiektuaren edizio berri bat jasoko du. Otsailaren 12a eta martxoaren 5a bitartean, 20 eta 44 urte bitartean dituzten eta goi-mailako titulazioa daukaten txorierritarrek eskualdeko enplegua sustatzearen aldeko proiektu batean parte hartzeko aukera izango dute. Ekimen honen 15. edizioa izango da Txorierrin eta, oraingoan ere, ekimena %100ean finantziatua egongo da, EGAZ Txorierri eta Europako Gizarte Funtsak erdibana ordainduta; horrenbestez, bertako partaideek ez dute inongo kosturik ordaindu beharko. Aurtengoan, bi fasetan garatuko da proiektua. Lehenengoan, Aktibatu deiturikoa, 80 orduko ikastaroa jasoko dute partehartzaileek, euren eskumen profesional era pertsonalak indartzeko teknikak erabilita: coaching teknikak, motibazio-dinamikak, laguntza pertsonalizatua eta abar. Kokatu izendatutako bigarren fasean, ordea, 200 orduko iraupena izango duen praktika garaia izango dute proiektuaren elkarlanean arituko diren enpresetan, euren balio eta gaitasunak erakusteko aukera bikaina izanda. Jada, izen-ematea irekita dago EGAZ Txorierriren web-gunearen bitartez eta, informazio gehiago behar izanez gero, bertara deitu dezakete interesatuek.

noticias de deia