'Erronka Garbia' ekimena

Bermeok 25 haritz landatu ditu Arranotegi auzoko Longane baserriaren inguruan

Iniziatiba honen helburua iazko Arrain Azokak ingurumenean izandako inpaktua konpentsatzea da

01.03.2020 | 11:27

Bermeok 25 haritz landatu ditu Arranotegi auzoko Longane baserriaren inguruan iazko Arrain Azokak ingurumenean izandako inpaktua konpentsatzeko. Ekimen hau 'Erronka Garbia' ekimenaren barruan kokatzen da.

Ekimen honek ekitaldi handiek ingurumenean eragin ditzaketen inpaktu negatiboak minimizatzea du helburu. Arrain Azokako kideek eta Bermeoko alkate Aritz Abaroak landatu dituzte zuhaitzak.
XXV. Arrain Azokaren inpaktua baxua izan zela uste da. Bertan sortu zen karbono aztarna 25 haritzen landaketarekin konpentsatu daitekeela uste da eta horregatik erabaki da 'Quercus robus' espeziea erabiltzea. Espezie honek, 25 urteren buruan, karbono kantitate hori xurgatu dezake arazorik gabe.

2019an egindako Arrain Azoka 'Erronka Garbia' ekitaldi jasangarrien iniziatibara batu nahi izan da. Honela, ekitaldi jendetsu honi lotutako ingurumen-inpaktu negatiboak murrizteaz gain, gainontzeko instituzio, entitate, enpresa eta publiko orokorrarentzat bultzatzaile bezala jokatu nahi izan du Arrain Azokak, hauen eguneroko ekintzetan jasangarritasun irizpideak barneratzea sustatuz.
2019ko Arrain Azokan parte hartu zuten agenteek ingurumen-inpaktu potentzialak identifikatu, hauek murrizteko neurriak diseinatu eta, azkenik, ekitaldi osoaren inpaktua kalkulatu dute, 'Erronka Garbia' metodologia erabiliz.

'Erronka Garbia' ziurtagiria

'Erronka Garbia' ziurtagiria Ihobe Ingurumen Kudeaketa Sozietate Publikoak ematen du, eta ekitaldi jendetsuek ingurumenean eragin ditzaketen inpaktu negatiboak minimizatzeko helburuarekin diseinuan eta antolakuntzan ingurumen-neurriak txertatzen dituzten ekitaldiak aitortzen ditu.

Ekimena barneratzen duten Arrain Azoka bezalako ekitaldiek hainbat jasangarritasun neurri ezartzen dituzte sei jokabide ardatz hauetan: mugikortasuna, energia, ura, erosketak, azpiegiturak eta hondakinak.