BARAKALDO. Herritarren kolaborazioa eskatu du Barakaldoko Udalak kaleetan dauden katu-kolonietan katakumeak daudela Lagunak Animalista Elkarteari jakinarazteko.
Facebook (@lagunakbarakaldo) sare sozialean daukan orrialdearen bidez egin daiteke, edo posta elektroniko bat bidaliz helbide honetara: informatica.lagunak.barakaldo@gmail.com.
"Hainbat katutxo batera agertzen badira, beti ez da izaten amak abandonatu egin dituelako. Ez ditugu ukitu behar gure usainaz ez kutsatzeko. Katakume talde bat ikusiz gero, babeslearekin harremanetan jartzea da onena, ama nor izan daitekeen badakitelako, boluntarioek kontrolatutako katua izan baitaiteke", adierazi du Delgadok.
Bistan badago, ordea, katutxoak abandonatuta daudela, Lagunak-ek Udaleko Garapen Iraunkorra eta Ingurune Naturala Arloari edo Udaltzaingoari abisatzeko esango du, animaliak biltzeko zerbitzuaren enpresa esleipendunari jakinaraz diezaioten, eta hark jaso eta zaindu ahal izango ditu.
Alba Delgadok azaldu duenez, katua urteko edozein unetan gera daiteke umedun, baina udaberria hasten denetik udazkenera arte da nagusiki araldia. Hori dela eta, aldi horretan kumaldi gehiago izaten dira.
Lagunak Animalista Elkarteko boluntarioak dira koloniak elikatzeaz eta CES metodoa ezartzeaz arduratzen direnak (harrapaketa, esterilizazioa eta askatzea).
Barakaldon gaur egun 76 pertsonak dute Garapen Iraunkorra eta Ingurune Naturala Alorreko baimena hiriko kale-katuen koloniak elikatzeko, Alba Delgadok azaldu duenez. Dekretu batek ematen die lan hori egiteko ahalmena, eta horrek segurtasun juridikoa ematen die, Bide Garbiketaren Ordenantzak debekatu egiten baitu kaleak zikintzea eta, beraz, animaliei jaten ematea. Harreman ofizial horretan ez daudenek ez dute katu barakaldarrak elikatzerik.
Elikatzaileek katuei jaten emateko baimena dutela egiaztatzen duen txartela dute, bai eta behar bezala serigrafiatutako txalekoa ere, identifikagarri egiten dituena, inolako dokumenturik erakutsi beharrik gabe. Zentzu horretan, Garapen Iraunkorreko eta Ingurune Naturaleko zinegotziak Lagunak Elkarte Animalistako boluntario horiek egiten duten "lan bikaina" goraipatu du.
CES metodoa oso efikaza dela erakutsi du katu-populazioaren hazkuntza. "Katuen bizi-kalitatea hobetzen du, baita inguruarekiko eta pertsonekiko harremana ere", adierazi du Alba Delgadok. Esterilizazioari esker, jaiotza-tasaren kontrolatzeak koloniaren tamaina egonkortzen du. Bertan bizi diren katuak geratzen dira, baina ugaltzeko aukerarik gabe. Horrela, murriztu egiten dira kolonia handiegia izateak bizilagunei eragin diezazkiekeen eragozpenak, eta hobeto kontrola daiteke animalien elikadura. Halaber, CESek karraskarien kontrol naturala dakar, katuen koloniak dauden eremuetan.
Hori dela eta, jabeen erkidegoei Lagunak-ekin edo udal arloarekin harremanetan jartzeko deia egin die zinegotziak, euren koloniak ere kontrolatzeko.
Alba Delgadok lur edo baratzeetan katuak dauzkaten barakaldarrei eskatu die esteriliza ditzatela, felinoen populazioa modu eraginkorrean kontrolatu ahal izateko.
Era berean, pertsona horiek lasaitu nahi izan ditu Delgadok, esterilizazioak karraskarien kontrolean aldaketarik eragiten ez duela argituz.
LEGE-ERREFORMA, MASKOTAK EZ DAITEZEN ONDASUNTZAT HARTU, IZAKI BIZIDUNTZAT BAIZIK
Alba Delgadok zoriontsu agertu zen, atzo, Kode Zibilean aldaketa bat eskatzen duen lege-proposamena aintzat hartu izana Diputatuen Kongresuak, etxeko animaliak "ondasun" izateari utz diezaioten eta "izaki bizidun" izenda ditzaten. Eraldaketa horrek eragotzi egingo du maskotak enbargatzea jabeek zorrak dituztenean edo hipoteka ordaindu ezin dutenean; gainera, dibortzio edo banantze kasuetan, epaile batek erabakiko du animaliak norekin geratuko diren, orain seme-alaben zaintzarekin egiten den bezala, eta bisita-araubidea ere ezarri ahal izango da.
"Animaliak sentiberatasuna duten bizidunak dira, ez gauza sinpleak, eta PSOE eta Unidas Podemosen ekimen honek beharrezko duintasunarekin tratatzea ahalbidetuko du", azaldu du Delgadok.
