BARAKALDO. Koronabirusaren pandemiak Barakaldoko Udalak urtero antolatu ohi dituen udalekuak bertan behera uztera behartu egin zuen iaz. Bada, aurten Udalak udalerriko haur eta gazteen aisialdirako ekintzak berreskuratuko ditu. Nerea Canterok zuzendutako Kultura Arloak programazio zabala eskainiko du, segurtasun-neurri guztiak betetzen dituena.
"Udari begira, uste dugu posible izango dela familia barakaldarrek atsegin handiz hartzen duten jarduera hori berreskuratzea, eskola-oporretan egiteko jarduera seguruak eskaintzen baititu", adierazi du Canterok.
Hiriko Udalekuak- Colonias Urbanas de Verano programa 10 eguneko bi txandatan egingo da, lehenengoa uztailaren 1etik 14ra, biak barne, eta bigarrena uztailaren 15etik 28ra, 16a barne, Barakaldon jaieguna izan arren. Udalekuak egingo diren uneko osasun-neurrietara egokituko dira jarduerak eta 700 toki izango dituzte.
Udalak lizitaziora atera du udalekuak egiteko 255.000,90 euroko gehieneko aurrekontua duen kontratua, eta Gabonetako kolonien programazioa ere barne hartzen du. Gabonetako oporraldiaren barruan 7 eguneko txanda bakarra egingo da.
"Barakaldon kultura seguruaren alde egiten dugu, eta uste dugu hiri-kolonien programa garrantzitsua dela, familiei lana eta eskola-oporrak uztartzen laguntzen baitie. Udari begira, uste dugu egingarriagoa izango dela zerbitzu hori berriro ematea osasun-neurri egokiekin, eta, beraz, hori guztia martxan izateko izapideak abiarazi ditugu. Nolanahi ere, pandemiaren egoerak hala eskatzen badu, edizioa eteteko aukera ere jasotzen da kontratuaren barruan", azpimarratu du zinegotziak.
