apirilaren 5ean eta 6an

“Ten for Enternity”, fisikoki osoenak diren pertsonen bila

07.02.2020 | 23:02
“Ten for Enternity” txapelketaren kartela.
BILBO. Sestaoko Kirol Promozio Taldeak "Ten for Enternity" izeneko txapelketa antolatuko du, apirilaren 5ean eta 6an, herrian  fisikoki osoenak diren pertsonak bilatzeko. Izena emateko epea urtarrilaren 30ean hasi zen, eta martxoaren 25era arte egongo da zabalik.  Interesa dutenek La Benedictako edo Las Llanaseko harrera-lekuan eman dezakete izena, edo, bestela, posta elektroniko honen bidez: kpsestaotaldea@gmail.com. Lehiaketa honetan parte hartzea doakoa da.

Txapelketak guztira hamar proba izango ditu. Horien bidez, hainbat gaitasun fisiko erakutsiko dituzte parte-hartzaileek; besteak beste, indarra, abiadura, erresistentzia, malgutasuna eta bizkortasuna.

Ekintzen egitaraua bi egunetan banatuko da. Apirilaren 5ean (ostirala), La Benedicta kiroldegian, proba hauek egingo dira: igeriketa, malgutasuna, bizkortasun-zirkuitua, lasterketa eta ergometroa. Hurrengo egunean (larunbata), Las Llanas kiroldegian izango da hitzordua, eta proba hauek egingo dira: menderatze-barrak, press banca, salto horizontala, sentadilla eta txingak. Proba horien guztien emaitza erabakigarria izango da "Ten for Eternity"-ren lehen edizioko irabazleak nortzuk diren zehazteko.

Parte-hartzaile guztiek oroitzapen-kamiseta bat jasoko dute, eta gizonezkoen eta emakumezkoen kategorian sailkatutako lehen hirurek, garaikurra eskuratuko dute.

Antolatzaileak publizitatea egiten ari dira kiroldegietako gimnasioetan, kartelen bidez eta Kirol Promozio Taldearen eta Sestaoko Udalaren sare sozialen bidez.

Txapelketa arautuko duten oinarri orokorrak eta erregelamendua ezarri dira. Kiroldegietan kontsultatu daitezke horiek. Sestao Kirolak dei egiten die kirola egiteko ohitura duten herritarrei, txapelketa honetan parte har dezaten, gainerako parte-hartzaileekin modu osasuntsu eta dibertigarrian lehiatzeko.