ERMUA. Astelehenean, hilak 10, hasi egingo da Ermuko udako zinema saioen bigarren astea. Hiru saio egingo dira: astelehenean, asteazkenean eta ostiralean, hirurak gaueko 22:00etan. Saioak Ermuko Orbe Kardinalaren plazan ospatuko dira. Euria egiten badu, parrokiako elizako arkupeetan egingo da.

Zine emanaldiak doakoak dira, baina edukiera kontrolatua izango dute, ezohiko osasun egoera dela eta. Horrela, segurtasun-neurri zorrotzen pean egingo dira, gomendatutako pertsonen arteko gutxieneko distantzia gordez. Gainera, publikoak bere maskara eraman eta eserita egon beharko du, eta barrutirako sarbidea eta hustea modu ordenatu eta mailakatuan egingo dira.

Abuztuak 10, astelehena: Familia al instante

Sean Andersek zuzendutako komedia estatubatuar batekin hasiko dugu astea: Familia al instante. Mark Wahlberg eta Rose Byrne Pete eta Ellie bikote gaztea dira. Biek euren zoriona eta guraso izateko nahia partekatzea erabakitzen dute, eta Juan, Lita eta Lizzy, haur anai-arrebak hartuko dituzte eurekin, familia ugaria osatuz. Baina horrekin batera hasiko dira borrokak, ate kolpeak, afari gorabeheratsuak, erantzukizun hirukoitzak eta, batez ere, familia handi bat.

Abuztuak 12, asteazkena: Yuli

Asteko bigarren proposamena Yuli da, Carlos Acosta dantzari kubatarrari buruzko film bat; bere bizitzan zehar bidaiatuko dugu, jatorriz zurientzat idatzitako balleteko paper ospetsuenetako batzuk interpretatu zituen lehen dantzari beltza izan baita, Houston Ballet edo Londresko Royal Ballet bezalako konpainietan. Azken horretan 15 urte baino gehiagoz lehen dantzaria izan da, gainera. Bere haurtzarotik heldutasunera arte bizitakoa kontatzen du zintak, eta dantzaria bera agertuko da protagonista gisa azken etapa horretan. Nazioartean arrakasta eta aintzatespena lortu arren, bere jatorria ez zuen sekula ahaztu Carlos Acostak.

Abuztuak 14, ostirala: Spider-Man: Lejos de casa

Abuztuko bigarren asterako azken proposamena Spider-Man: Lejos de casa akziozko filma da, Jon Wattsek zuzendutako armiarma gizonaren atal berria. Tom Holland, Samuel L. Jackson, Jake Gyllenhaal eta Zendaya dira filmeko protagonistak, eta Peter Parkerrek MJ, Ned eta gainerako lagunekin batera Europara egingo duen bidaia kontatuko digu. Hala ere, Parkerren plana, aste batzuetan bere superbotereak alde batera uztearena, eten egiten da Nick Fury berarekin harremanetan jartzen denean kontinentean kaosa eragiten ari diren oinarrizko izaki batzuen erasoa geldiarazteko laguntza eskatzeko. Une horretan, Parkerrek Spider-Manen trajea jantzi beharko du beste behin bere lana betetzeko.