Udalaren neurri berria

Amorebieta-Etxanok terrazak handiagotzeko aukera emango die ostalariei

09.05.2020 | 04:00

AMOREBIETA-ETXANO. Hurrengo astelehenetik aurrera, Bizkaiko tabernari askok terrazak aterako dituzte kalera. Hori bai, hainbat segurtasun neurri bete behar izango dituzte, hala nola mahaien arteko distantzia mantentzea. Horregatik, Amorebieta-Etxanoko Udalak terraza handitzeko aukera emango die lizentzia duten ostalariei.

Neurria ezohikoa izango da eta aldi baterakoa, eta Covid-19aren ondorio ekonomikoak arintzen lagunduko die profesionalei, aplikatu daitekeen kasu guztietan.

Eskaria jaso ondoren, Amorebieta-Etxanoko Udalak terraza handitzeko aukera aztertuko du, ondokoak kontuan izanda: pasatzeko utzi beharreko gutxieneko zabalera, hiri altzariak non dauden, inguruan herri lanak egiten ari diren, terrazaren alboan zebra-biderik dagoen, edo bestelako osasun segurtasun eta interes publikoko inguruabarrak.

Edozein kasutan, handitu ondoren terrazaren azalera osoa ezin izango da jadanik baimendutakoaren bikoitza baino handiagoa izan. Gainera, mahai eta aulkien banaketa terrazaren titularraren erantzukizuna izango da. Honek bezero eta oinezkoen arteko segurtasun distantzia bermatu beharko du, eta baita mahaietako bezeroaren artekoa ere.

Terrazak handitu nahi dituzten ostalariek, eskaria aurkeztu beharko dute udaletxean, establezimenduaren izena eta helbidea adieraziz eta baita terrazaren titularraren izena eta telefono zenbakia.

Eskariarekin batera titularraren erantzukizunpeko adierazpena aurkeztu beharko da, terraza handiago hau salbuespenezko egoera honetan bakarrik eta Udalak adierazi arte izateko konpromisoa hartuz. Gainera, handitutako azalerak ostalaritzako establezimenduaren fatxadaren luzera gainditzen duenean, handitze honek eragiten dion jarduera edo lokalaren titularraren berariazko baimena erantsi beharko du.

noticias de deia