Zabalik Alde Zaharreko ostalariek moduluzko osagaiak eskatzeko epea

BILBO. Atzo, abenduak 10, ireki egin zen Alde Zaharreko ostalariek moduluzko osagaiak eskatzeko epea. Moduluzko osagai bakoitza mahai garai batek eta bi jarlekuk osatzen dute.

Alde Zaharrean, 154 lokal daude lizentziadunak eta terraza gabeak. Ohiko egoeran, gehienek ezingo lukete eskatu inolako osagairik, eta are eta gutxiago terrazarik. Alabaina, ikusirik zer bilakaera izan duen egoera sanitarioak, Udalak uste du baietz, baimendu ahal izango lukeela moduluzko elementu horiek ipintzea.

Baimen hori eskuratzeko, alabaina, beharrezkoa da zenbati baldintza betetzea:

• Modalitate hau, hain zuzen, Alde Zaharrerako baizik ez da, kanpoan utzita Plaza Barria, Unamuno Plaza, María Muñoz kalea (ostalaritzako establezimendu gehiegi daudelako) eta Kantoiak eta Kale Barria (5 metro baino gutxiagoko zabalera dutelako).

• Moduluzko osagaiak jartzeko baimen hauek balioa galduko dute behin osasun agintariek kalean zutik kontsumitzeko baimena ematen dutenean.

• Ezingo dira eskatu moduluzko bi unitate baino gehiago establezimenduko.

• Eskabideak banan-banan aztertuko dira, eta ukatu egingo zaie atari eta etxabeetako bidea oztopatzen dutenei eta etxaurrearen zabalera dela-eta, pertsonen arteko tartea gorde beharrez eta establezimenduko sarrera oztopatu gabe, beste moduluzko unitate bat jartzeko aukerarik ematen ez dutenei.

Bizkaiko Ostalaritza Elkartearekin eta Alde Zaharreko merkatari, ostalaritza eta enpresen Elkartearekin adostu den neurri honekin Bilboko Udalak lagundu egin nahi die ostalariei, dauden kaleen ezaugarri bereziengatik terraza jartzea eskatu ezin dutenei.

Eskabide hori egiteko, ostalari bakoitzak dagokion orri-eredua bete behar du (honekin batera doan agiria) eta posta elektroniko bidez bidali Bilboko Udalaren Espazio Publikoaren Zuzendaritzari espaciopublico.up@bilbao.eus) edo Bizkaiko Ostalaritza Elkartearen Zuzendaritzari (terrazasbilbao@asociacionhosteleria.com). Halaber, Zazpi Kaleetako Merkatarien Elkartearen bidez ere izapidetu daiteke eskabidea: asociacion@cascoviejobilbao.com.

Aurki aztertuko da eta emango da ezagutzera, orobat, terraza baimenduetan itxiturak jartzeko aukera, dela espaloietan dela galtzadan, salbuespen moduan, ordea, egoera sanitarioa dela-eta.