BLV-ART programaren barruan

Zabalik dago 'Arty walks' ekimenean parte hartzeko izena emateko epea

24.08.2020 | 15:59
La Ribera zubiaren artxiboko irudia.

BILBO. Gaur, hilak 24, astelehena, 'Arty walks' izeneko Bilbo Zaharreko arte eta sorkuntza guneetan egingo diren ikustaldi gidatuetan izena emateko epea ireki egin da. Ekimen hau BLV-ART programaren barruan dago.

Kultur ibilbide hauek doan eskainiko dira, eta irailaren 18an eta 19an egingo dira (barikua eta zapatua), 18:00etatik aurrera; ikustaldiek bi ordu inguru iraungo dute.

'Arty walks' ikustaldi bakoitzean, azalduko da nola eragiten duen kulturak Bilbo Zaharra bizitzen ari den eraldaketan, eta nola garatu den gero komunitate artistiko bat, zeina inguru hartan finkatzen ari baita. Horrez gain, sorkuntza-guneen arduradunek parte hartzaileei azalduko diete zeintzuk diren gune horien bereizgarriak, eta, erakusketen kasuan, aukera izango da artistekin berba egiteko haien obren inguruan.

Izena emateko, nahikoa da mezu elektroniko bat bidaltzea hona: cultura@bilbao.eus. Mezuan, ikustaldian parte hartu nahi dutenen izen-deiturak, helbide elektronikoa eta harremanetarako telefonoa, adina, lanbidea eta bizitokia adierazi beharko dira. Epea irailaren 13an amaituko da, eta pertsona bakoitzak ibilbide bakarrerako eman ahalko du izena.

Aurten, ibilbideetarako lekuetan muga izango da, neurri sanitario eta segurtasunezkoak betetzeko. Lekuak horrela mugatuta, izena ematen duten pertsonei galdegiten zaie ezen, hitzordura ezin badira etorri, jakinaraz dezatela behar besteko aurretiaz, hartara haien lekua eskaini ahal izateko zerrendan itxaroten daudenei.

'Arty walks'en aldi honetan, ekimen berriak gehitu zaizkio ikustaldien programari, inguru hartan ospea duten artistak eta lekuak sartuz, hala nola Pikara Magazine, era guztietako gaiak –gizarte, politika nahiz kultura sailetakoak– ikuspegi feminista batekin lantzen dituen kazetaritzan aritzen den proiektu bat; Caóstica, komunikazioaren, ikus-entzunezkoen ekoizpenaren, diseinu grafikoaren eta pedagogiaren arloetako profesionalen kolektiboa; edo La Deriva Taller de curiosidades-Lurpeko Bitxiak, lurpean dagoen sorkuntza-ingurune bat, produkzio estetikoan eta plastikoan jarduten dena, edo esku hartze publikoan eta kaleko artean.

HIRI ARTEA

'Arty walks'en parte hartzen duten pertsonek aukera izango dute Ruth Juan artista bartzelonar Bilbon finaktuak Sortzez Garbiaren komentuan egindako horma irudia ikusteko. Artistak berak aurkeztuko du obra.

Ruth Juan Bilboko San Frantzisko auzoan bizi da duela 10 urtetik, eta, orain, inguru hartako hiri paisaiari erantsi dio horma-irudi handi-handi bat, 100 metro ingurukoa, komentu horren harresian egina.

Ruth Juanen lanak hiria du ardatz, eguneroko bizimodua, gizarte auziak eta lankidetza proiektuak. Bilbao Arte Fundazioak beka bat eman zion 2013an, eta han sortu zuen lehen liburu irudiztatua, "Bilbo Zaharra, tolerantzia eremua". Gaur egun, hainbat proiektutan ari da irudiztatzaile freelance gisa, eta berak sortu du Juanita Makina marka. Liburuetarako marrazkiak nahiz umeentzako biniloak edo irudi grafikozko lanak nahiz horma irudi koloretsuak egiten ditu; horma-irudi horietako bost, preseski, Bilbo Zaharrean daude kokatuta, hala nola Marzana ostatuan, Gorte kalean, eta mintzagai dugun hau, Sortzez Garbiaren komentuan.

Komentua, gaur den egunean ere jardunean baita, 1861ean inauguratu zen. Gerra Zibilaren hasieran, 1936ko uztailaren 20an, talde armatuak sartu ziren bertara, eta erre egin zuten, eta komentua uztera behartu serorak. Ihes egitea lortu zuten, ostera, guardia eta miliziano batzuen bihotz onari esker, eta, 1946an, arkitektura multzo osoa berreraiki zuten, eta 1957an berrinauguratu zuten, San Frantzisko auzoaren bihotzean bertan. Hain zuzen, serorategi horretara eramaten dute hiriko emaztegaiek dozena bat arrautza, ezkontza egunean eguraldi ona izan dadin.

ORDUTEGIAK ETA BISITAK

BLV – ART programak lau hitzordu proposatzen ditu 'Arty walks' ikustaldietan parte hartzeko.

Irailaren 18an, 18:00etan

1. ibilbidea, Sarean-en hasiko da, eta, ondoren, Ruth Juan-en horma-irudia, Juan Pikara, Caóstica eta La Deriva ikusiz osatuko dute ibilbidea.

2. ibilbidea, Marzana ostatuaren kanpoaldean elkartuko dira, eta han hasiko dute ikustaldia; ondoren, La Deriva, Caóstica, Pikara ikusiko dituzte, eta, azkenean, Ruth Juanen horma-irudia ikusiko dute Sortzez Garbiaren komentuan.

Irailaren 19an, 18:00etan

1. ibilbidea, Sarean-en hasiko da, eta ondoren Ruth Juan-en horma-irudia, Juan Pikara, Caóstica eta La Deriva ikusiz osatuko da ibilbidea. Euskaraz.

2. ibilbidea, Marzana ostatuaren kanpoaldean elkartuko dira, eta han hasiko dute ikustaldia; ondoren, La Deriva, Caóstica, Pikara ikusiko dituzte, eta, azkenean, Ruth Juanen horma-irudia ikusiko dute Sortzez Garbiaren serorategian.

BLV – ART

BLV-ART programak kulturaren alde egin nahi du, kultura edukiz Bilbo Zaharra eta San Frantzisko auzoen garapena eta birgaitze osoa eragiteko eragiletzat. Bilboko Udalaren Kultura Sailak antolatutako ekimen honen xedea da kultur espezializazioa eragitea inguru hartan, auzotarren eta bisitarien beharrei erantzunez.