Ermuak doako zine emanaldiak eskainiko ditu San Pelaio parkean

Udaren hasierarekin batera, Ermuko Udalak aire libreko lau zine emanaldi eskainiko ditu, haur eta familientzat bideratutakoak. Proiekzioak San Pelaio parkean egingo dira ekainaren 29an, uztailaren 1ean, 6an eta 8an, 21:00etan, eta euria egitekotan Orbe Kardinaleko estalitako gunera aldatuko da kokalekua.

Proiekzio horiek udaleko Hezkuntza, Kultura, Gazteria eta Kirol Sailak antolatu ditu eta doakoak izango dira. Jarduera hori haurren Aurrekontu Parte hartzaileen 2025eko prozesuan jasotako proposamen emaitza da. Ermuko neska-mutilek hainbat ekimen aurkeztu zituzten euren kolektiboari zuzendutako aisialdi eskaintza hobetzeko. Udako zinea aukeratua izan zen proposamenetakoa da.

Datak

Programak hainbat titulu biltzen ditu, familian gozatzeko. Lehen proiekzioa ekainaren 29an izango da, astelehena, eta 'Cazafantasmas: Imperio helado' filma ikusi ahal izango da. Uztailaren 1ean, asteazkena, 'Space Jam' filma eskainiko dute, euskaraz. Uztailaren 6an, astelehena, 'Momiak' proiektatuko da, hau ere euskaraz. Zikloa uztailaren 8an amaituko da, asteazkenean, 'Campamento Garra de Oso' lanarekin.

Proposamenak haurrak eta familiak gonbidatzen ditu esperientzia ezberdineaz gozatzera, udako gauak aprobetxatuz, aire zabaleko ingurunean. Bertaratzen diren pertsonak beren ogitartekoarekin joatera eta aulki tolesgarria eramatera animatzen dituzte antolatzaileek, erosoago egon nahi badute, baina zuzenean lurrean ere eseri ahal izango dira.

Kultura Sailak familia guztiak animatu nahi ditu ekimen honetan parte hartzera. Aisialdia, bizikidetza eta kultura uztartzen ditu, herritar guztientzako espazio ireki eta irisgarri batean.