Eusko Jaurlaritzak alerta laranja aktibatuko du asteazkenean eta ostegunean, maiatzaren 27an eta 28an, Kantauri barnealdean espero diren tenperatura altu eta iraunkorrengatik. Neurria Euskadin aste honetan izaten ari den bero boladaren testuinguruan hartu da, eguneko zein gaueko tenperatura altuak espero baitira.
Jaurlaritzak azaldu duenez, Euskalmet euskal meteorologia agentziaren arabera, egoera antizikloniko batek eta aire masa oso bero bati lotutako gandor subtropikal batek baldintzatuko dute eguraldia. Horren ondorioz, egonkortasuna, lehortasuna eta giro eguzkitsua nagusituko dira gutxienez ostiralera arte.
Tenperatura iraunkor altuengatik ezarritako alerta laranja 24 orduz egongo da indarrean asteazkenean eta ostegunean Kantauri barnealdean. Aurreikuspenen arabera, asteazkenean gutxieneko tenperaturak 17 graduren bueltan kokatuko dira eta maximoak 33 gradura irits daitezke; ostegunean, berriz, 18 eta 33 gradu arteko balioak espero dira.
Horrez gain, tenperatura oso altuengatik ezarritako abisu horia ere aktibatuta egongo da bi egunetan, 13:00etatik 20:00etara. Asteazkenean barnealde osoan izango du eragina, eta ostegunean bereziki Kantauri barnealdean.
Euskalmetek azpimarratu du alerta laranja ezartzearen arrazoia beroaren iraupena dela, tenperatura altuak hainbat egunez jarraian mantenduko baitira, bai eguneko maximoetan bai gaueko minimoetan, batez ere Kantauri barnealdean.
Bestalde, astearte honetatik ostegunera arte basoko suteen arriskuagatik ere abisu horia egongo da indarrean, tenperatura altuek eta hego-haizeak arriskua handituko baitute.
Asteburuari begira, Euskalmetek eguraldiaren egoerak normaltasunerantz egin dezakeela aurreikusi du. Larunbatetik aurrera ipar-haizea nagusitu liteke eta tenperaturak jaitsi daitezke, urte sasoi honetarako ohikoagoak diren balioetara itzuliz.
