1,4 milioi euro Barakaldo Antzokia berritzeko
Klimatizazio-sistema bat instalatuko da, areto nagusiko besaulkiak berrituko dira eta komunak hobetuko dira, irisgarriago egiteko
Barakaldoko Udalak 1.4 milioi euroko inbertsioa egingo duBarakaldo Antzokiaren historiako berrikuntzarik handiena egiteko, erosotasuna eta funtzionaltasuna hobetzeko helburuarekin. Komunak aldatuko dira baita ere, guztiz irisgarriagoak eginez. Aste honetan hasi dira lanak.
36 urteko historia du Barakaldoko antzokiak, eta lan berri hauek dira egin direnen artean garrantzitsuenak, antzerkiaz gozatzera joaten diren pertsonen esperientzia nabarmen hobetuko baitute. Lehenik eta behin, klimatizazio-sistema bat instalatu egingo da, urte osoan tenperatura egonkorra eta erosoa bermatzeko, kanpoko baldintza meteorologikoak alde batera utzita. "Sistema jasangarria izango da, energia aurreztuko dugu eta denbora berean esperientzia ezin hobea emango dugu antzokian", nabarmendu du Rakel Olalla Barakaldo Antzokiko presidenteak, eta gogorarazi du Barakaldo Antzokia hirian bildutako 67 babesleku klimatikoetako bat dela.
Era berean, besaulki-patioa guztiz berrituko da. Klimatizazio-sisteman obrak handiak direnez, egungo besaulkiak kendu beharko dira, eta, horren ordez, eserleku ergonomikoagoak eta erosoagoak jarri ahal izango dira. Jarduketa horrek aretoaren zoruan esku hartzea ere ekarriko du, eta zementatu eta nibelatu egingo da errenkada berriak behar bezala instalatzeko.
Proiektuak, gainera, agertokiko oihala eta beste ehun-elementu batzuk berritzea ere jasotzen du, espazio eszenikoaren estetika eta funtzionaltasuna hobetzeko.
Azkenik, eraberritzea komunen eremura ere iritsiko da, guztiz irisgarriak izan daitezen. "Eraberritzeak Barakaldo Antzokiaren prestazioen hobekuntza oso garrantzitsua ekarriko du, Bizkairako erreferente kultural izateko bokazioarekin jarraituko baitu", adierazi du Olallak Antzokirako ilusioz beteriko fase berri honetan.
Antzokiko 2. aretorako sarbidea
Obrak direla eta, maiatzean programatutako ikuskizun guztiak 2. aretoan izango dira, edukiera txikiagoko espazio batean, baina publikoak asko estimatzen du, akustika bikaina duelako eta artistekiko hurbiltasuna ahalbidetzen duelako. Ikusleak Antzokira sartzeko modua ez da aldatuko, eta, ohi bezala, igogailua erabili ahal izango da 2. aretora iristeko, beheko solairuan baitago.
Udazkenerako aurreikusita dauden ikuskizunak datozen asteetan ezagutuko dira, baina aurreratu daiteke lehenengo asteak 2. aretoan eta kalean izango direla, Barakaldo Antzokiak Rataplan Jaialdiarekin elkarlanean jardungo baitu eta programazioaren zati bat hiriko plaza eta parkeetara eramango baitu.
Ostiral Flamenkoak jaialdiak ere ez du hutsik egingo eta bere 30. urteurrenari amaiera emango dio areto nagusi erabat berrituarekin.