'Torrente presidente' filma proiektatuko du aste honetan Ermua Antzokiak

Ermua Antzokiak lau film proiektatuko ditu ostegun honetatik igandera bitartean. Aste honetako tituluak 'Valor sentimental', 'La hija pequeña', 'Torrente presidente' eta animaziozko 'Tafiti y sus amigos' izango dira.

Osteguneko zineklubean, 20:30etan, 'Valor sentimental' ikusi ahal izango da jatorrizko bertsioan, gaztelaniazko azpitituluekin. 135 minutuko iraupena duen film norvegiarra da, Joachim Trierrek zuzendua, drama familiarra. Ama hil ondoren, Nora eta Agnes ahizpek Gustav Borg aitarekin elkartuko dira. Izen handiko zinema zuzendari beteranoa da, zeinak bere alaba Norari, antzerkiko aktoreari, papera eskainiko dio bere hurrengo filmean. Norak errefusatu egingo du eta laster jakingo du paper hori Hollywoodeko izar gazte eta sutsu bati eman diola. Nazioarteko film onenaren Oscar saria eta Europako film onenaren Goya saria. (Norvegia).

Asteburua

Zine komertzialaren atalean, larunbatean 19:30ean eta astelehenean 20:30ean hurrenez hurren, 'La hija pequeña' filma ikusi ahal izango da. Hafsia Herzik zuzendutako ekoizpen frantsesa. Nerabezaroari eta homosexualitateari buruz hitz egiten digun drama da. Fatimak 17 urte ditu, eta hiru ahizpen arteko txikiena da. Familia franko-aljeriar zoriontsu eta maitekor batean bizi da, auzo txiroan. Ikasle ona, Pariseko Unibertsitatean sartu zen. Emakume heldu gisa, familiatik eta tradizioetatik emantzipatu eta urruntzen da. Frantziako Cesa eta Cannes Zinemaldiko emakumezko antzezle onenaren sariak jaso ditu.

Asteburuko bigarren proposamen komertziala 'Torrente presidente' titulua da, detektibearen sagaren azkena. Santiago Segurak zuzenduriko lan berriak 106 minutu irauten du. José Luis Torrente, Espainiako heroi nazionala dela sinetsita nahiz inolako gaitasunik eduki ez politikan sartzeko konbentzitua da, eta, bere estilo arrunt, demagogiko eta burutazioz betearekin, alderdi populista baten lider bihurtzea lortzen du. Larunbatean 22:00etan eta igandean 19:30ean ikusi ahal izango dute ikusleek.

Azkenik, haur eta familientzako igandeko saioan, 17:00etan, 'Tafiti y sus amigos' izeneko animazioaz gozatu ahal izango dute ikusleek, Nina Welsek eta Timo Bergek elkarrekin zuzendutako ekoizpen alemaniarra. Istorioak kontatzen duenez, Tafitik, surikata gazteak, Bristles, txerri basatia, ezagutzen duenean, badaki ezin direla lagunak izan. Baina Bristles arrano batek erasotzen duenean, Tafiti da hura erreskatatzera korrika joango dena.