'Noraezaren Itzalean' erakusketa ikusi ahal izango da Elorrion
Inaugurazioа martxoaren 31n izango da 19:00etan, eta apirilaren 30era arte ikusgai egongo da
Datorren asteartean, martxoaren 31n, inauguratuko dute Elorrioko Iturri kultur etxeko erakusketa aretoan Andrea Jiménez eta Jon Garate artisten Noraezean Itzalean izeneko lana. Arratsaldeko 19:00etan izango da ekitaldia, eta obra apirilaren 30era arte ikusi ahal izango da.
Erakusketak gaur egungo errealitateari begirada kritikoa eskaintzen dio, bereziki azpiegitura handiek ingurumenean eta gizartean duten eraginari dagokionez. Andrea Jiménezek azaldu duenez, bere lana “desinformazioaren aurkako erantzun gisa jaio da”, eta AHTaren inguruko diskurtso ofizialaren aurrean sortutako hutsune informatiboa salatu nahi du. Horretarako, zazpi estanpaz osatutako grabatu bilduma eta gaiari buruzko liburuxka bat sortu ditu, azpiegitura horrek eragiten dituen kalteak ikusgarri egiteko.
Jon Garateren lana
Bestalde, Jon Garatek lau urteko sormen prozesu baten emaitza aurkezten du, Euskal Autonomia Erkidegoko bailara menditsuetan AHTaren eraikuntzak eragindako paisaia-aldaketak eta galera sinbolikoak ardatz hartuta. Bere hitzetan, lanak natur ingurunearekiko lotura emozionala eta identitarioa azaleratu nahi ditu, baita “ingurune kaotiko eta heterogeneo baten ordez begirada geometriko eta kalkulatu bat ezartzen duen” garapen ereduaren ondorioak ere. Hortik sortzen da erakusketari izena ematen dion ikuspegia: Noraezaren Itzalean.
Erakusketa bi alditan egongo da zabalik: martxoaren 31tik apirilaren 10era 9:00etatik 14:00etara, eta apirilaren 13tik 30era 9:00etatik 20:00etara, astelehenetik ostiralera. Proposamen honek berriro ere Iturri Kultur Etxea sorkuntza eta hausnarketarako gune bihurtzen du, eta Udalak herritarrak bertara hurbiltzera gonbidatzen ditu.