Barakaldoko Udalak Novalti industriagunea erosi du

Hiriaren garapen ekonomikoaren, berrikuntzaren eta enplegu eraginkorra eta kalitatezkoa sortzearen zerbitzura jarriko du Barakaldoko Udalak erosiko duen Novalti industriagunea, Kareaga auzoan kokatutakoa.

Erosketa aurtengo gerakinak inbertitzeko udal-politikaren barruan dago, 22 milioi euro, hain zuzen ere. "Baliabide horien zati handi bat proiektu honetara bideratzen da, helburu argi batekin: superabita Barakaldoko bizilagunei zuzenean mesede egiten dieten ekimenetan iraultzea", azaldu du Iratxe Foces Ogasuneko zinegotziak.

Industria-gunea ondo komunikatutako eta hirigunetik gertu dagoen eremu batean dago, eta funtsezko gune bihurtuko da jarduera ekonomikoa erakartzeko, bereziki sektore berritzaileei eta balio erantsi handiko sektoreei lotuta. Novaltiren historia ulertzeko 1998ra arte bidaiatu behar da. Orduan, Udalak Kareaga Iparraldea poligonoko hiru udal-lurzatiren gaineko azalera-eskubidea esleitu zion enpresari. Eskubidea 2000. urtean formalizatu zen 75 urterako, eraikitako eraikina Udaletxera doan itzuliko zenean (2075). Hainbat urtetako jardueraren ondoren, enpresa hartzekodunen konkurtsoan sartu zen, eta gaur egun aktiboen likidazio-fasean dago. Udalak lehentasunez eskuratzeko eskubidea du, eta eskubide hori proposatzen du orain, osoko bilkuran, eraikitakoaren jabetza erabiltzea eta eskuratzea, 3,35 milioi euroren truke.

"Operazio honek instalazioen erabilera interes orokorrera bideratzea bermatzen du, enplegu egonkorra eta kalitatezkoa sortzen duten ekimenak ezartzen lagunduz, eta hori ezin izango litzateke esku pribatuetan ziurtatu", azaldu du Focesek. Udalak aurreikusten du ingurune horretan berrikuntzarako eta enpresajarduerarako laborategi bat garatzea, enpresa eta proiektu berriak erakartzeko.

Kalitatezko enplegua eta tokiko industria-sarea bultzatzea

Ikuspegi ekonomikotik, erosketa oso aukera ona da diru-kutxa publikoentzat, merkatuko balioa (8,5 milioi eurotan tasatua) baino nabarmen txikiagoa baita, "eta horrek udal-baliabideen kudeaketaren eraginkortasuna indartzen du", azpimarratu du zinegotziak.

Erabaki horrekin, Udalak aurrera egiten jarraitzen du garapen ekonomiko iraunkorrarekin, tokiko produkzio-sarea indartzearekin eta Barakaldoko bizilagunentzako lan-aukerak hobetzearekin duen konpromisoan, ondare publikoa sendotuz hiriaren etorkizuna eraikitzeko.

22 milioi euroko diruzaintzako gerakina

Barakaldok lanean jarraitzen du 2026ko aurrekontuak onartzeko. Joan den otsailaren 9an, urte amaieran aurkeztutako aurrekontu-zirriborroan akats bat antzeman ondoren, dagokion arloari entregatu zitzaion, dagokion txostena egin zezan eta alegazioak aurkezteko epea ireki zezan. Egun, kontu-hartzailetzak izapide hori amaitu eta aurrera egiten jarraitzeko zain gaude. Aurrekontu-likidazioa amaitu da, eta hor islatzen da diruzaintzako gerakinen datua, 2025eko ekitalditik ateratakoa.

Udalak 38 milioi euro ditu, eta horietatik 16 urte amaieran formalizatutako kontratu eta proiektuekin konprometituta daude. Gobernu taldeak, beraz, 22 milioi euro izango ditu, aurreko urteetan bezala, barakaldarrek eskatutako proiektuak gauzatzeko inbertituko direnak, baita udal zerbitzuak hobetzeko ere, hala nola Kbus garraio publikoa, 2026 osoan deskontuak mantenduko dituena. Aurten, aipatutako Novalti erosteaz gain, Llanoko frontoiaren estalkia, Bizkaia kaleko arrapala mekanikoak (Arrontegi auzoan), Lasesarre kiroldegiko kirolpistaren estalkia, Arrontegiko autobiderako irteera berria, auzoetako argiztapena hobetzeko proiektu berriak, aparkalekua handitzea, Serralta parke berrian ur-parke bat jartzea....

Gainera, gerakinaren zati bat ezustekoetarako gordeko da. "Soberakinak behar posibleetarako prest egoten lagunduko digu, eta, aldi berean, gure bizilagunen bizi-kalitatea hobetzeko proiektuak martxan jartzen jarraituko dugu: irisgarritasuna, aparkaleku gehiago, auzoetako argiztapen hobea...", nabarmendu du Fozosek.

Proiektu estrategikoetarako mailegua

Gainera, aldi berean, Udalak kontratazio-mahaia egin du gaur goizean, Barakaldok eskatu duen 21,6 milioi euroko maileguaren kontratazio-prozesua burutzeko, hiriaren bigarren eraldaketa sozial eta urbanoa burutzeko proiektu estrategikoak abian jartzeko.

Operazio honi esker, Udalak bere kontuak saneatuta mantendu ahal izango ditu eta, aldi berean, Bagatza, Gurutzeta, Retuerto eta Arrontegi auzoetan sarbide mekanikoak martxan jarri ahal izango ditu. Halaber, Bagazta auzoko Emakumeen Etxearen obra egin ahal izango da, eta Ansio inguruan Udaltzaingoarentzako komisaria berri bat sortu ahal izango da. Horrez gain, maileguak Urban Bizi Lab proiektua martxan jartzea bultzatuko du, hiriko enpresa berritzaileen artean sinergiak sortzeko eta kalitatezko enplegu egonkorrerako aukerak sortzeko. Ibaiak birnaturalizatzeko prozesuak ere martxan jartzen dira, eta Serraltako zelaian klubentzako gune bat sortzen

"Beraz, 40 milioi euro baino gehiago izango ditugu Barakaldoko bigarren eraldaketa sozial eta urbanoa gauzatzeko bidean aurrera egiteko. Hiriak ez ezik, gure bizilagunek ere jasoko dute eraldaketa horren onura", esan du zinegotziak.