Sodupeko tuneleko lanak amaitu ditu Aldundiak
Egitura modernizatu da Bizkaiko Tunelen Segurtasunari buruzko Foru Dekretuaren baldintza teknikoak eta segurtasunekoak betetzen direla bermatzeko
15 hilabetez lan eta lan egon ondoren eta 3,9 milioi euroko inbertsioa egin eta gero, Bizkaiko Foru Aldundiak amaitutzat eman ditu aste honetan Sodupeko tunela Bizkaiko Tunelen Segurtasunari buruzko Foru Dekretura egokitzeko lanak.
Proiektuaren helburua azpiegitura modernizatzea eta, Bizkaiko Tunelak Ikuskatzeko Erakundeak emandako gomendioen arabera, baldintza tekniko eta segurtasun-baldintza zorrotzenak betetzen direla bermatzea izan da, erakunde horrek hainbat "desadostasun eta hobetzeko behar" antzeman baitzituen.
Obrek tunelaren azpiegitura eta haren sistema osagarri guztiak -energia elektrikoa, aireztapena, suteen aurkako babesa, kontrola eta komunikazioak- hartu dituzte, eta segurtasunean, eraginkortasunean eta digitalizazioan oinarritutako esku-hartze integrala egin da.
Azpiegiturari dagokionez altxatuak eta pitzadurak konpondu dira, iragazketak eta hezetasunak zigilatu dira, efloreszentziak garbitu dira eta hormapikoetan eta gangan pintura babesgarria eta iragazgaitza aplikatu da, horrela estalduraren iraunkortasuna eta egoera hobetuz.
Sistema elektrikoa erabat berritu da, kableatua suaren aurkako belaunaldi berriko materialekin ordezkatuz, potentzia handiagoko ekipo elektrogeno eta SAI berri bat instalatuz eta ekipo guztiak SCADA kontrol-sistemara konektatuz.
Argiztapenari dagokionez, tunelak orain DALI erregulazio automatikoa duen LED teknologia du eta, horri esker, argi-mailak trafikoaren eta kanpoko argiaren baldintzetara egokitu daitezke, energia-kontsumoa murriztuz eta ikuspena hobetuz. Era berean, ebakuazio-argiteria berria instalatu da, eta argi horiek larrialdi-sistemetan integratu dira.
Segurtasun eta kontrol aurreratuak
Suteen aurkako babes-jarduketen barruan sartzen dira su-itzalgailu, sirena eta sakagailu berriak instalatzea, bai eta gela teknikoetan agente gaseosoaren bidez automatikoki itzaltzeko sistema bat jartzea ere.
Segurtasunari eta zaintzari dagokienez tunelak ekipo berriak ditu orain: bereizmen handiko kamerak, mezu aldakorreko panelak, aspa-gezi seinaleak, LED semaforoak, ixteko hesi baskulatzaileak eta erradiazio-kable bidezko irrati-telefoniako sistema bat larrialdietan komunikazioa hobetzeko.
Proiektuaren zati gisa, ustiapeneko 3D BIM eredu digitala ere garatu da, as built dokumentazioa integratzen duena eta etorkizunean tunelaren mantentzea, kontrola eta kudeaketa bideratzen dituena.
Jarduketa honekin Sodupeko tunela erabat egokituta dago tunelen segurtasunari buruz indarrean dagoen foru-araudira, eta instalazio erabat berrituak eta kudeaketa-sistema eraginkorragoak eta jasangarriagoak ditu.
Carlos Alzaga, Azpiegituretarako eta Lurralde Garapenerako foru diputatuaren arabera, "herritarrek gero eta sentsibilitate handiagoa dute ingurumena eta jasangarritasuna babesteko, eta, beraz, berrikuntza teknologikoak eta errepideei aplikatutako eraikuntza-teknika berriek errealitate horri erantzun behar diote".
Era berean, Alzagak nabarmendu du Bizkaiko Foru Aldundiaren "erantzukizuna" dela foru sareko "errepide-azpiegitura guztietan segurtasun-, zerbitzu- eta babes-maila handia, uniformea eta etengabea bermatzea, lurraldean mugikortasun jasangarria lortzeko".