Emakumeak Ahalduntzeko eta Prestakuntza Feministarako Eskolaren edizio berria abiarazi du Sestaok

Ostegun honetan goizean, martxoaren 5ean,Sestaoko Udalak urteko lehen seihilekoan garatuko den Emakumeak Ahalduntzeko eta Prestakuntza Feministarako edizio berria aurkeztu du, Gizarte Ekintza eta Berdintasuneko zinegotzi den Yosune Serapioren bitartez. Ekimen hau Berdintasun sailak jarri du martxan. Programazioa zazpi tailer, hitzaldi bat eta antzezlan bat osatzen dute.

Ahalduntzeko Eskola 2019. urtean sortu zen aurretik Berdintasun Arloak antolatzen zituen tailerrei jarraipena emateko. Harrezkero, erreferentziazko gune egonkor gisa finkatu da udalerrian.

Yosune Serapiok azpimarratu duenez, “Eskola da irismen eta eragin handieneko tresna bat Berdintasun Zerbitzuan. Topaketarako, hausnarketarako eta eztabaidarako gune bat eskaintzen du adin eta ibilbide desberdineko emakumeen gizarte-partaidetza sustatzeko. Gainera babes-, truke- eta sororitate-sareak bultzatzen ditu”.

Programaren helburua da partaideak jardunbide eta teoria feministetara bultzatzea, esperientziak partekatzea, taldean hausnartzea eta banaka nahiz erkidegoan zaintzeko eremuak sortzea. “Egungo testuinguruan, gune horiek sortzea oso eraldatzailea da”, azpimarratu du zinegotziak.

Herritarrentzako jarduera irekiak

Edizio berri hau inauguratu baino lehen, bi jarduera ireki antolatuko dira herritar guztientzat.

Martxoaren 10ean (asteartea), 19:00etan, Musika Eskolan “Casarse por papeles… ¿Es verdadero amor?” antzezlana izango da. Panchita Uchisen istorioa kontatzen du. Nikaraguako langile migratzailea da. Bartzelonan bizi da, eta bere administrazio-egoera legeztatu nahi du. Ironiaren eta samurtasunaren bidez, lanak hausnarketa egiten du emakume migratu askok bizi behar dituzten zailtasunei buruz, bereziki, zaintzen arloan badihardute.

Bestalde, martxoaren 11n (asteazkena), 18:30ean, Udal Liburutegia “Abrir melones feministas en tiempos de polarización” hitzaldiaren eszenatoki bihurtuko da June Fernández kazetariari esker. Topaketak egungo feminismoan sare sozialen eginkizuna jorratuko du. Mobilizazio handiak bultzatzeko gaitasuna eta eztabaidak alboratu eta sinplifikatzeko arriskuak aztertuko dira. Saioak pentsamendu kritikoari eta giza eskubideen defentsari erreparatuko dio.

Tailerren programazioa

Eskolak berriz egingo ditu proposamenak goizez eta arratsaldez. Goizez honako hauek antolatuko dira:

• Chi Kungen tailerra errepikatuko da, aurreko edizioetan eskea handia izan delako eta arreta ona eman zaiolako.
• Irakurketa feministaren kluba; emakume idazleen obrak aztertuko dira hausnarketa partekaturako gunea sortuz emakumeek idatzi duten literaturaren inguruan.

Bost tailer antolatuko dira arratsaldez:

• Sestaoko oroimen historikoa emakumeen esperientzietatik abiatuta. Udalerriaren iragana berreraikiko da bizi-istorioen bidez honako esparru hauetan: lana, zaintzak, hezkuntza edo familiak. Oroimen, dokumentu eta objektu pertsonalak erabiliko dira xede horrez.
• Gorputzaren aniztasunari buruzko tailer artistikoa; gaia lantzeko, emakume artisten artelanetara joko da, eta buztinez egindako eskulturak sortuz amaituko da, inspirazioa emakumeen erreferentziak izanik.
• Autodefentsa feministako tailerra, indarkeria matxistak prebenitzeko; horri esker, indarkeriaren egoerak identifikatuko dira, eta partaideei baliabide fisikoak eta psikologikoak emango zaizkie autoestimua eta segurtasuna indartzeko.
• Zoru pelbikoari buruzko tailerrak gorputzaren zati hori landuko du fisioterapiatik, mugimendutik eta sexualitatetik abiatuta, zaintzaren ikuspegi integrala eta kolektiboa sustatuz.
• “Érase una vez… el matriarcado vasco” ikastaroak kontzeptu horren inguruko mitoak jorratu eta hutsalduko ditu, kontakizun historiko eta kultu​ralei buruzko begirada kritikoa sustatuz.

Izen-emateak eta haurtzaindegi-zerbitzua

Izena emateko epea martxoaren 9ra arte egongo da irekita. Interesdunek izena eman ahalko dute udal-webgunean eskura dagoen inprimakia betez, aurrez aurre Berdintasun Arloan edo inprimakia bete ostean posta elektronikoz bidaliz.

Gainera, Berdintasun Arloak doako haurtzaindegi-zerbitzua egokituko du, asistentzia errazteko eta uztartzea parte hartzeko oztopoa ez dela bermatzeko.