Uriguen Parkea berrituko du Mungiak

Mungiako Uriguen Parkeak itxura berria izango du. Herritarrek aurrekontu parte-hartzaileen prozesuaren bidez bertanko altzariak berritzea aukeratu zuten, eta Udala martxan jarriko da eskaera horri erantzuteko.

Garatzen ari diren ekintzen artean daude egungo bankuen eta paperontzien ordez eredu ekologiko berriak jartzea, mugikortasun urriko pertsonentzako iturri irisgarri bat jartzea, eta parkean atsedenleku bat sortzea. Neurri honek komunitatea bere ingurunearen hobekuntzan inplikatzea sustatzeaz gain, udalerriak iraunkortasunarekiko eta ingurumenaren errespetuarekiko duen konpromisoa ere nabarmentzen du.

Banku eta paperontzi berriak material birziklatuz eginda egongo dira, eta horrek % 100 birziklagarriak izatea bermatzen du, horien ingurumen-inpaktua murriztuz. Gainera, parkeko altzarien eta iturrien elementu zaharretako batzuk bertsio ekologikoagoekin eta irisgarriagoekin ordeztuko dira, hala nola, Uriguen parkean dauden hiru harrizko iturrien batekin eta Landetxo kalean dagoen harrizko beste iturri batekin. Elementu berri horiek ingurumena errespetatzen duten materialekin ere egingo dira.

Egingo den beste neurri nabarmenetako bat egungo merenderoa eta barbakoa kentzea izango da. Inguruko natura eta kultura ondare baliotsua babesteko premiari erantzuten dio erabaki horrek, inguruneko elementu adierazgarrienen kontserbazioa lehenetsiz. Parkeak ibilbide botaniko garrantzitsua du, bertako floraren aberastasuna nabarmentzen duena, eta Landetxo Goikoa baserritik hurbil dagoenez, inguruko eraikuntza garrantzitsuenetako bat baita, are premiazkoagoa da bertako ekosistema eta kultur tradizioa babestea. Horrela, elementu horiek babestea lehentasun bihurtzen da, epe luzera haien kontserbazioa bermatzeko.

Beste bi askaldegi

Aipatzekoa da udalerrian beste bi askaldegi daudela (Zabalondon eta Birlen), eta Udala dagoeneko aztertzen ari dela udalerriko beste toki batean askaldegi eremu berri bat sortzeko bideragarritasuna.

Hobekuntza horien osagarri, atsedenleku berri bat jarriko da, sei etzalekuz osatua, bizilagunei eta bisitariei erlaxatzeko eta naturaz gozatzeko gune egoki bat eskainiz.

Jarduera honen guztizko aurrekontua 17.000 eurokoa da, eta altzariak berritzeko eta azpiegitura berriak instalatzeko erabiliko da, betiere jasangarritasunaren, irisgarritasunaren eta komunitatearen ongizatearen ikuspegitik.

Hobekuntza horiekin, Mungiako Udalak hiri-ingurunea hobetzeko eta natura errespetatzeko konpromisoa berretsi egiten du, eta Uriguen Parkeak herritar guztientzako gozamen-gune izaten jarraituko duela ziurtatzen du.