Amorebieta-Etxanok inauterietako egitaraua aurkeztu du
Ohiko moduan, Perubelek emango die hasiera inauteriei otsailaren 13an, arratsaldeko 19:00etan Zelaieta parkeko kioskotik abiatuko den kalejirarekin
Datorren ostiralean, otsailaren 13an, Perubelek emango die hasieraAmorebieta-Etxanoko inauterien ospakizunei. Bost egun iraungo dute jaiak, hurrengo astearterarte, eta Udalak adin eta gustu guztientzako ekintzez eta jarduerez osatutako egitaraua aurkeztu egin du.
Relacionadas
Egitarau anitz bezain zabala
Otsailaren 13an, ostirala, emango zaie hasiera inauteriei. 17:00etatik aurrera, ludotekan, eskulan tailerra izango da, eta 18:00etan, Gaztedi Berri Fanfarria taldeak girotuko du festa Abasolo Apezpiku kalean. 19:00etan, Zelaieta parkeko kioskotik Zubiondora abiatuko da kalejira, Perubelen aurkezpenarekin eta Udazken gaitero taldearen laguntzarekin. Kalejira horren ondoren, 19:30ean, txorizo eta sagardo dastaketa egingo da Zubiondo plazako karpan, DJ Xaiborren musikaz lagunduta, festa gauean barrena luzatzeko.
Otsailaren 14an, larunbatean, ospakizunek jarraipena izango dute. 12:30ean, Udabarri Dantza Taldeak inauterietako dantza tradizionalak eskainiko ditu herriko kaleetan. Arratsaldean, 17:00etan, inauterietako photocalla jarriko da Zubiondo plazako karpan, eta aldi berean eskulan tailerra egingo da ludotekan. 18:00etan, “Harreman” umeentzako ikuskizuna eskainiko du Zirkozaurrek Zelaieta parkean. Eguna amaitzeko, 19:00etan, Triki Piu Pand taldearen kalejira izango da San Juan kaletik abiatuta, Gernika plaza, Andra Mari plaza eta Zezilia Gallartzagoitia plazaren inguruan.
Otsailaren 16an, astelehenean, 11:30ean, inauterietako pintxo lehiaketa ospatuko da, Nafarroa Zentroan. Lehiaketan, inauterietako ogi txigortua izango da osagai nagusia.
Azkenik, otsailaren 17an, asteartea, Euskal Mitologia Desfilea eta Lehiaketa egingo dira 11:30ean Nafarroa Zentroan, bertako erabiltzaile eta profesionalen parte-hartzearekin. Arratsaldean, 17:00etan, Polaroid photocalla eta Instagram bidezko mozorro lehiaketa egingo dira ludotekan,eta eskulan tailerrak gaztetxokoan. 18:00etan, Ene Kantak taldeak “Dantzan” umeentzako ikuskizuna eskainiko du Zubiondo plazako karpan. Inauteriei amaiera emateko, 19:00etan, Zubiondo plazatik Zelaietara abiatuko da azken kalejira, Perubelen agurrarekin, Udazken gaitero taldearekin eta Zinbulu Dantza Bertikala taldearekin.
Amorebieta-Etxanoko Udalak zornotzar guztiak inauteriez gozatzera animatzen ditu, herriko kaleak giroz, kolorez eta parte-hartzez betez, eta egitarauak eskaintzen dituen ekitaldi eta proposamenetan parte hartzera gonbidatuz.