Lizitaziora Ispasterko elkartegiaren obrak
Enpresa-egoitza berria jarduera ekonomikoa bultzatzeko eta lurralde-oreka indartzeko foru-estrategiaren parte da, eta Basokoetxe industrialdean kokatuko da
Pixkanaka-pixkanaka aurrera doa Basokoetxe industrialdea kokatuko den Ispasterko elkartegia eraikitzeko obren proiektua. Oraingo honetan, Bizkaiko Foru Aldundiaren Azpiegiturak foru-entitate publikoak 4.517.572,75 euroan atera ditu lanak lizitaziora.
Elkartegiak bi eraikin izango ditu banatuta, eta erdian bide bat, multzoa antolatu eta artikulatzeko. Industria-eraikinaren azalera eraikia 2.879,81 metrokoa izango da espazio garden batean, eta barnean sektoreka nabe txikiagoetan antolatzeko aukera izango du enpresa erabiltzaileen beharren arabera. Hirugarren sektoreko eraikina, berriz, koadroko 1.143,91 metrokoa izango da, enpresa-bulego eta -zerbitzuetarako.
Zentroak bulego-moduluak eta industria-moduluak izango ditu alokairu-erregimen hutsean eta erosteko aukera ematen duen alokairu-erregimenean, ekimen ekintzaileentzat eta hazkundean dauden enpresentzat. Eskualdean, gune horiek erraztasunak emango dituzte proiektu berriak ezartzeko, lehendik dauden jarduerak areagotzeko eta kalitateko enplegua sortzeko.
Obrak egiteko interesa duten eraikuntza-enpresek datorren urtarrilaren amaierara arteko epea dute dokumentazio teknikoa aztertzeko eta eskaintzak aurkezteko. Epe horretan, pleguak eta betekizun teknikoak eta administratiboak kontsultatu ahal izango dituzte, Azpiegiturak foru-entitateak gaitutako kanalen bidez.
Bizkaiko beste enpresa-egoitza batzuk
Ispasterko enpresagune berria Azpiegiturak foru-entitateak kudeatutako elkartegien foru-sarearen parte izango da, eta Azpiegituretarako eta Lurralde Garapenerako sailaren mendeko, Bizkaiko enpresa-ehunerako sostengu-tresna gisa. Helburua da enpresa-ekimenetarako gune eskuragarriak eta malguak eskaintzea, kasu honetan, Lea-Artibaiko eskualdean, garapen jasangarria eta orekatua lortzen laguntzeko.
Elkartegiak sarearen azken bi jarduketak, Ispasterkoaren aurre-aurrekoak, Gernika eta Zallako egoitzak izan dira. Horietako lehenengoa, 2017ko maiatzetik 2019ko urtarrilera bitartean garatu zen, 6,9 milioi euro inguru inbertituta, eta Busturialdeko garapen ekonomikoaren ardatza da.
Enkarterriko azpiegiturak, berriz, 2025eko otsailean amaitu zituen lanak, urtebete baino gehiagoko lanen eta 6,5 milioi euro inguruko inbertsioaren ondoren. Aurtengo udazkenean, lehen enpresek beren jarduera profesionalari ekin zioten.